Reali turpërohet nga modestët e Gironas, humb ndeshjen me përmbysje nga katalunasit (Video)

Real Madridi ka humbur në ndeshjen e tyre në udhëtim nga skuadra modeste, Girona me rezultat 2-1 në ndeshjen e vlefshme për javën e 10-të të kampionatit spanjoll, La Liga.

Djelmoshat e trajnerit Zinedine Zidane nuk kanë mundur të vazhdojnë serinë pozitive të fitoreve, pasi pas katër fitoreve radhazi janë mposhtur nga Girona.

Pjesa e parë e takimit ishte e barabartë nga të dy skuadrat që rrezikuan disa herë për të shënuar golin e parë të ndeshjes.

Megjithatë, ishin vetëm mysafirët nga Madridi atë që gjetën rrugën e rrjetës me anë të Iscos, i cili shënoi në minutën e 12-të për 1-0 dhe me këtë rezultat skuadrat shkuan në pushim.

Në pjesën e dytë, gjithçka foli në të mirë të vendasve, të cilët intensifikuan sulmet për të gjetur golin e barazimit, të cilin e gjetën shpejt, ndërsa në atë valë erdhi edhe goli e epërsisë.

Luhej minuta e 54-të e ndeshjes, kur sulmuesi Christian Stuani arriti të shënoj një gol të bukur për barazimin e rezultatit në 1-1.

Pas vetëm katër minutave, Girona gjeti edhe golin e epërsisë 2-1, ku kësaj radhe shënues ishte Portu, i cili shënoi gol të bukur me thembër nga afërsia.

Deri në fund të ndeshjes, vendasit luajtën në mënyrë perfekte duke krijuar edhe shumë raste për thellimin e epërsisë, ndërsa edhe Reali pati disa gjysmë-raste për të barazuar rezultatin, por ishte e kot pasi rrjetat më nuk u tunden dhe ndeshja përfundoi me fitoren e Gironas me rezultat 2-1.

Pas kësaj humbje, Reali e sheh veten në pozitën e tretë me 20 pikë, ndërsa Girona ngjitet në vendin e 11-të me 12 pikë.

Në ndeshjen e ardhshme, skuadra e Zidanes luan në shtëpi ndaj Las Palmasit, ndërsa Girona udhëton drejt Levantes. /Telegrafi/

https://www.youtube.com/watch?v=Rps3Oxt-4Vs&feature=player_embedded

https://www.dailymotion.com/video/x66r8o0

https://www.youtube.com/watch?v=_-XrrvPp40k