Reagon OVL e UÇK-së: Nuk kemi luftuar që të shohim xhandarmërinë serbe të futet në territorin e Kosovës sa herë të dojë

Kryetari i Organizatës së Veteranëve të Luftës së UÇK-së, Hysni Gucati ka reaguar ashpër në lidhje me pamjet që janë publikuar , për hyrjen në territor të Kosovës, të xhandarmërisë serbe.

Gucati përmes një postimi në Facebook, ka thënë se është turp që institucionet e Republikës së Kosovës nuk reagojnë dhe nuk marrin asnjë veprim me atë që ka ndodhur sot.

Lexo po ashtu Dalin pamje të reja të xhandarmërisë serbe në Karaçevë, kërkohet intervenimi i KFOR-it dhe institucioneve qendrore të Kosovës

Ai shton se “veteranët e UÇK-së nuk kanë luftuar që të shohim Xhandarmërinë serbe të futet në territorin e Kosovës sa herë të dojë”.

“Është një turp i madh që institucionet e Rebulikës së Kosovës nuk reagojnë dhe nuk marrin asnjë veprim me atë që ka ndodhur sot, ku Xhandarmëria serbe është futur në territorin e Kosovës në fshatin Karaçevë të Kamenicës, bëhen kinse nuk kanë parë dhe nuk ka ndodhur asgjë, a duhet përsëri që veteranë e Ushtrisë Çlimitare të Kosovës të mbrojnë shtetin e Kosovës përderisa Qeveria hesht dhe nuk është në gjendje asnjë reagim të bëjë e lëre diçka me shumë, i bëjmë thirrje institucioneve të Republikës së Kosovës që raste të tilla mos të përsëriten, veteranët e UÇK-së nuk kanë luftuar që të shohim Xhandarmërinë serbe të futet në territorin e Kosovës sa herë të dojë, turp për Qeverinë e Republikës së Kosovës për mos reagimin dhe marrjen e ndonjë veprimi”, shkruan ai.

Lexo po ashtu Shqetësohen banorët e Karaçevës, xhandarmeria serbe filmohet nga kamerat e sigurisë duke kaluar në parkingun e një restoranti

Ndryshe, banorët e fshatit Karaçevë të Kamenicës janë shprehur tejet të brengosur, për faktin se nëpër parkingun e një restoranti të këtij fshati janë parë dhe filmuar pjesëtarët e xhandarmerisë serbe duke kaluar.

Kurse, ish-kryetari i Kamenicës, Shaip Surdulli ka publikuar pamje të reja ku shihen xhandarmëria serbe duke hyrë në territorin e Republikës së Kosovës.

Pas publikimit të pamjeve të xhandarmërisë serbe, ku janë parë në dy vende duke hyrë në zonën kufitare në fshatin Karaçevë të Kamenicës, ka reaguar edhe kryetari i kësaj komune, Qëndron Kastrati.

Lexo po ashtu Vjen reagimi i Qëndron Kastratit: Hyrja e militarëve të armatosur serbë në Karaçevë, provokim dhe terrorizim i qytetarëve të kësaj zone

Kastrati përmes një postimi në Facebook ka thënë se është tejet shqetësuese që përsëri sot gjatë ditës janë parë ushtria serbe në territorin e Kosovës, madje në një zonë të frekuentuar nga banorë të të gjitha moshave. /Telegrafi/