Reagon djali i Haxhi Shalës: Jemi njoftuar për transferimin e tij në Hagë, nuk i dimë arsyet

Djali i Haxhi Shalës, Flakroni ka reaguar lidhur me ndalimin dhe transferimin e babait të tij në Gjykatën Speciale në Hagë.

Ai ka thënë se si familje ende nuk kanë informacion për arrestimin apo ndalimin, e as për arsyet se pse Haxhi Shala po transferohet në Hagë.

“Sot kemi marrë informacione për transferimin e tij në Hagë me urdhër të prokurorit, e ne si familje ende nuk kemi informacion për arrestimin apo ndalimin, e as arsyet se pse ai po transferohet në Hagë”, ka shkruar Flakron Shala në Facebook.

Lexo po ashtu Haxhi Shala transferohet në Hagë

Ai tutje është shprehur se janë të bindur për pafajësinë e Haxhi Shalës dhe “të të gjithë çlirimtarëve që janë në atë gjykatë”.

“Sepse kjo gjykatë është e njëanshme sepse gjykon çlirimtarët që mbrojtën vendin dhe të drejtat e tyre për liri”.

Më tëj, ai ka kërkuar falje që nuk ka mundur t’u përgjigjet telefonave të të gjithë atyre që janë interesuar për gjendjen e babait të tij, por ka thënë se “si familje kemi qenë në një situatë që nuk nuk kishim asnjë informacion që nga intervista e prindërit”.

Ish-deputeti dhe ish-eprori i Ushtrisë Çlirimtare të Kosovës (UÇK), Haxhi Shala, është transferuar në Gjykatën Speciale në Hagë.

Këtë e ka konfirmuar për Telegrafin, avokati i tij, Xhevdet Smakiqi.

Shala, i njohur si Komandant “Topi”, u ndalua dhe u dërgua në zyrat e EULEX-it të hënën.

Po ashtu, EULEX-i ishte edhe në shtëpinë e Shalës, por sipas kreut të OVL UÇK-së në Malishevë, nga aty nuk është marrë asgjë. /Telegrafi/