Radoiçiq heq dorë nga 6 biznese, ua transferon pronësinë vëllezërve Veselinoviq

Deri më 6 tetor, Milan Radoiçiq, ish-nënkryetar i Listës Serbe, bashkë me Zvonko Veselinoviqin dhe Zharko Veselinoviqin ishte bashkëpronar i kompanisë ndërtimore INKOP  nga Çupria dhe nëpërmjet tij në pesë kompani të tjera. Por, nga 6 tetori Radoiçiq nuk figuron më në listën e pronarëve.

Milan Radoiçiq ua dorëzoi vëllezërve Veselinoviq pronësinë në kompaninë ndërtimore INKOP dhe pesë kompani të tjera varëse me të.

SiN shkruan “N1“, duke e hequr veten nga lista e pronarëve të kompanisë INKOP nga Çupria [Serbi], Milan Radoiçiq automatikisht pushoi së qeni bashkëpronar në pesë kompani të tjera më 6 tetor – “Dolly Bell” Novi Beograd (aktivitete hotelesh dhe akomodime të ngjashme), “Novi Pazar – Put” (e regjistruar për ndërtimin e rrugëve dhe autostradave), “Betonjerka Aleksinac” (merret me prodhimin e shtyllave të betonit, nënstacioneve dhe elementeve mbështetëse për ndërtimin dhe mirëmbajtjen e objekteve të eletroenergjisë), “VelmorTrans plus Çupria” (e regjistruar për transport tokësor urban dhe ndër-urban të udhëtarëve ), por edhe “Putna Izgradnja Rozhaje” në Mal të Zi (degë e kompanisë “Novi Pazar – Put”), transmeton Telegrafi.

Përndryshe, këto pesë kompani janë në pronësi 100% të kompanisë INKOP me seli në Çupria, pronar i së cilës deri vonë ishte Milan Radoiçiq.

Gjatë vitit 2022, INKOP, së bashku me filialet e tij, ka realizuar të hyra nga biznesi prej 10,67 miliardë dinarë dhe një fitim neto prej 2,67 miliardë dinarë.

Pjesa e Radoiçiqit prej 40 për qind, pas daljes nga pronësia, u nda nga dy pronarët e mbetur – vëllezërit Veselinoviq.

Kështu, Zvonko Veselinoviq tani zotëron 60 për qind, në vend të 40 për qind të kompanisë, dhe Zharko Veselinoviq zotëron 40 për qind, në vend të 20 për qind, të kompanisë INKOP.

Radoiçiq dhe Veselinoviq

Milan Radoiçiq dhe Zvonko Veselinoviq janë sërish në shënjestër të opinionit për shkak të punës së tyre me policinë dhe gjykatat.

Radoiçiq akuzohet nga Prokuroria për veprat penale të bashkimit me qëllim të kryerjes së veprave penale, prodhim, posedim, mbajtje dhe trafikim i paligjshëm i armëve të zjarrit dhe lëndëve shpërthyese dhe vepra të rënda kundër sigurisë së përgjithshme. Ndërsa biznesmeni Zvonko Veselinoviq më 4 tetor ishte intervistuar nga policët e Departamentit të Policisë së Beogradit në lidhje me informacionin se Veselinoviq ka porositur dhe paguar për organizimin e vrasjes së inspektorit Slobodan Milenkoviq, si dhe vrasjen e inspektorit Dushan Mitiq.

Lexo po ashtu Deputeti opozitar në Serbi: Novi Sadin tash e "kontrollojnë" Andrej Vuçiq dhe grupi kriminal i Zvonko Veselinoviqit

Si Radoiçiq ashtu edhe Veselinoviqi njihen si pronarë të kompanive në industrinë e ndërtimit, rritja e biznesit të të cilëve është ndikuar edhe nga puna në projekte shtetërore.

Kompanitë e tyre në periudhën e kaluar, sipas gazetës Danas, kanë qenë të angazhuara në projekte të tilla si ndërtimi i autostradës Prelina-Pozhega dhe rrugëve të shpejtësisë së lartë Iverak-Lajkovac dhe Pozharevac-Golubac, megjithëse ata [Radoiçiq dhe Veselinoviq] janë nën sanksionet e SHBA-vë nga viti 2021.

Kompani edhe në Mal të Zi

Shoqëria ekonomike INKOP është themeluar në maj të vitit 1992 në Lazarevac për veprimtarinë ndërtimi i rrugëve dhe autostradave.

Sipas raporteve zyrtare financiare, struktura e pronësisë së kompanisë ndryshoi më 8 mars 2013, duke marrë mbi 100 për qind të aksioneve në kompani. Pastaj selia e kompanisë u zhvendos në Çupri, kurse dhe Dushica Maksimoviq u bë pronare, transmeton Telegrafi.

Sipas BIRN, supozohej se ajo ishte pronarja fiktive e kompanisë dhe një mburojë për punët që Zvonko Veselinoviq i drejtonte nga hija.

Siç shkruante BIRN, ajo zyrtarisht ia dorëzoi kompaninë Veselinoviqit më 19 shtator 2018, përkatësisht 40 për qind të aksioneve të kompanisë, ndërsa të njëjtën shumë ia transferoi kumbarit të tij Milan Radoiçiq. Pjesa e mbetur prej 20 për qind e aksioneve iu transferua vëllait më të vogël të Veselinoviqit, Zharko Veselinoviq.

Lexo po ashtu Firma, hotel, vilë dhe miliona euro - pasuria e Millan Radoiçiqit në Serbi

Në shënimet e pasqyrave financiare të konsoliduara të shoqërisë INKOP për vitin 2022, thuhet se më datë 12 maj 2016, INKOP themeloi filialin “Dolly bell”, kodi kryesor i aktivitetit të së cilës është 5510-hotele dhe akomodime të ngjashme.

“Në vitin 2019, kompania mëmë blen në ankand 100 për qind të aksioneve në kompaninë “Betonjerka Aleksinac” dhe gjithashtu bëhet pronare e 100 për qind të kapitalit në kompaninë “Novi Pazar – Put”, me ndryshimin që regjistrohet në Agjencinë për Regjistrat e Bizneseve të Serbisë (APR). më 6 janar 2020”, thuhet në këtë dokument të publikuar në prill.

Ndërmarrjet varëse që marrin pjesë në konsolidim janë: “Dolly Bell Novi Beograd”, “Betonjerka Aleksinac”, “Novi Pazar – Put” dhe kompania malazeze “Putna Izgradnja Rozaje”, pronar 100% i së cilës është “Novi Pazar – Put”.

“Pjesëmarrjet në kapitalin e personave të tjerë juridikë në vlerë prej 60 milionë dinarë i referohen pjesëmarrjes 100 për qind në” VelmorTrans Çuprija”. Regjistrimi i pronësisë është kryer më 6 janar 2023 në APR. Pjesa e kapitalit të “VelmorTrans” është blerë në vitin 2022”, thuhet në shënimet e pasqyrave financiare të konsoliduara.

Sipas këtyre të dhënave, numri mesatar i të punësuarve në këto kompani është 646 punëtorë (në vitin 2021 ishin 743).

Të ardhurat nga biznesi mbi 10 miliardë dinarë

Llogaritë përfundimtare të konsoliduara të kompanisë INKOP, të cilat përfshijnë pesë kompanitë e përmendura, tregojnë se të ardhurat operative në vitin 2022 ishin 10,666,725,000 dinarë, që i bie rreth 90 milionë euro.

Kolektivisht, këto kompani kanë realizuar fitim prej 2,672,162,000 dinarë, që është më shumë se 22 milionë euro.

Sipas të dhënave nga llogaria e konsoliduar e fitimit dhe humbjes, fitimi neto që i takon personit juridik amë (pra kompanisë INKOP) është pikërisht ai – 2,672,162,000 dinarë.

Të dhënat nga raportet e konsoliduara për vitin paraprak tregojnë shuma të ngjashme – të hyra operative prej 10.2 miliardë dinarë dhe fitim neto prej 2.2 miliardë dinarë, që i takonin edhe subjektit juridik amë.

Një vit më parë, në vitin 2020, të hyrat e konsoliduara të biznesit ishin dukshëm më të ulëta dhe arritën në 6,436,070,000 dinarë, ndërsa fitimi neto ishte 1.7 miliardë dinarë.

Edhe para sulmit ndaj policisë së Kosovës më 24 shkurt, që Kosova e cilëson si sulm terrorist, autoritetet në Kosovë e kanë lidhur emrin e Millan Radoiçiqit me aktivitete kriminale.

Edhe Zvonko Veselinoviq është lidhur me krime në Kosovë.

Sulmi në Banjskë nga Serbia nuk po trajtohet si akt terrorist dhe Millan Radoiçiq nuk është akuzuar për vrasjen e policit kosovar, Afrim Bunjaku, gjatë paraqitjes para Zyrës së Prokurorisë së Lartë në Beograd.

Në mesin e krimeve për të cilat ai dyshohet se ka kryer janë shkaktimi i rrezikimit të publikut dhe posedimi i paligjshëm i armëve.

Radoiçiq dhe vëllezërit Vesellinoviq janë nën sanksione të Shteteve të Bashkuara dhe Mbretërisë së Bashkuar. Por, Serbia ka thënë se nuk e ka obligim ndërkombëtar që t’i respektojë këto masa ndëshkuese.

Ata u vendosën nën sanksione të SHBA-së në dhjetor të vitit 2021 nën dyshimet për krim të organizuar dhe korrupsion./Telegrafi/