Raab i Britanisë së Madhe: Agresioni i Rusisë në Ukrainë mund të zgjasë disa muaj ose vite

Zëvendëskryeministri i Britanisë së Madhe, Dominic Raab ka thënë se pushtimi rus i Ukrainës mund të zgjasë disa muaj ose vite.

“Ne nuk duhet të kemi asnjë dyshim se misioni ynë me aleatët tanë është të sigurojmë dështimin e Putinit në Ukrainë dhe do të marrë pak kohë. Ne po flasim për muaj, nëse jo vite, dhe për këtë arsye ne do të duhet të tregojmë një qëndrueshmëri strategjike sepse kjo nuk do të përfundojë brenda disa ditësh”, citohet të ketë thënë ai, përcjell Telegrafi.

Raab tha se kur shikoni atë që Putini ka bërë në të kaluarën, në të gjitha luftërat në të cilat ai ka qenë i përfshirë, ju shikoni taktikat në Siri… “Unë nuk mendoj se ka ndonjë taktikë që ai nuk do ta përdorte”.

Lexo po ashtu Gjithçka që ndodhi nga dita e tetë deri në ditën e njëmbëdhjetë të agresionit rus në Ukrainë

“Por unë do të thosha këtë. Mendoj se NATO dhe vendet e Evropës Qendrore dhe Lindore janë absolutisht të vendosura dhe ne do t’i mbështesim ato deri në fund”.

Ndërsa i pyetur për zhvillimet më të fundit në avancimin rus, Raab thotë se Vladimir Putin i tha popullit rus se pushtimi do të ishte “shumë më i lehtë se sa doli”.

Ai tha se kjo është pjesërisht një dëshmi e qëndrueshmërisë dhe guximit të popullit ukrainas.

Lexo po ashtu Putin 'ringjall' Millosheviqin - deklarata që tregojnë ngjashmërinë e madhe në retorikën e tyre

Raab thotë se Britania e Madhe ka mbështetur Ukrainën dhe i ka ndihmuar të trajnojnë rreth 22,000 forca të armatosura.

Por ai tha se Ukraina ka “dëshmuar padyshim një perspektivë më të ashpër sesa priste Putin”.

Ai shtoi: “Dhe kjo ka një efekt në moral, edhe në palën ruse. Sigurisht, në të njëjtën kohë, ne kemi vendosur paketën më të madhe të sanksioneve që mbaj mend”. /Telegrafi/