Publikohen detajet e Eurovision Song Contest 2025 – çmimet e biletave deri në 370 euro

Transmetuesi Zviceran SRG SSR ka njoftuar detajet e Konkursit të Këngës në Eurovision 2025 në Bazel.

Ata njoftuan se finalja e madhe do të mund të shihet në stadiumin e futbollit në Bazel, St. Jakob-Park, u zbuluan çmimet e biletave, slogani dhe logoja e Eurovisionit si dhe skena.

Biletat

Platforma zvicerane e biletave TicketCorner është partneri zyrtar i biletave për Eurosong 2025. Regjistrimi kërkohet për të blerë bileta për konkursin në Bazel. Ky proces do të parandalojë rishitjen e biletave dhe do të sigurojë që sa më shumë fansa të Eurosong të kenë mundësinë t’i shikojnë shfaqjet drejtpërdrejt.

Regjistrimi paraprak tashmë ka filluar dhe përfundon në mesnatën e 10 janarit 2025. Shitja zyrtare e biletave fillon më 29 janar 2025, një ditë pas shortit të gjysmëfinaleve. Çmimet për shfaqje dhe kategori të ndryshme do të variojnë nga 40 euro deri në 370 euro.

View this post on Instagram

A post shared by Eurovision Song Contest (@eurovision)

Identiteti vizual

Identiteti vizual dhe audio për edicionin e 69-të të Eurovision Song Contest u zhvillua nga drejtori artistik Artur Deyneuve. Qëllimi i tij ishte të krijonte një dizajn që do t’i bënte njerëzit të ndiheshin të dëgjuar dhe të vlerësuar. I frymëzuar nga tradita zvicerane e demokracisë së drejtpërdrejtë, e cila sillet rreth dëgjimit dhe dialogut, Deyneuve zgjodhi “dëgjimin” si temë qendrore të të gjithë konceptit.

“Nëse dëgjojmë njëri-tjetrin, do të gjejmë dashuri”, tha Deyneuve. Ky mesazh do të përcillet edhe vizualisht përmes simbolit ikonik të zemrës së Eurovisionit, i cili përfaqëson dialogun, unitetin dhe fuqinë unifikuese të muzikës.

“Uniteti formohet nga dashuria”, është tema e Eurovision Song Contest në Zvicër.

Skena

Dizajni i skenës është frymëzuar nga malet dhe diversiteti zviceran. Florian Wieder, një skenograf me rrënjë zvicerane, po mbikëqyr projektimin e skenës së Eurovisionit për të tetën herë. Për eventin e këtij viti në St. Jakobshalle në Bazel, Florian tregon se ai mori frymëzim nga malet zvicerane dhe diversiteti i vendit.

“Qëllimi ynë ishte të krijonim një koncept revolucionar skenik – një përvojë gjithëpërfshirëse e pa parë kurrë më parë në Eurovision Song Contest. Falë paraqitjes mbresëlënëse të skenës, publiku do të jetë në gjendje të jetë pjesë e Festivalit të Këngës në Eurovision si kurrë më parë”, tha ai.

View this post on Instagram

A post shared by Eurovision Song Contest (@eurovision)

Finalja do të mund të shihet në stadium

Eurovision Song Contest 2025 do të mbahet nga 13 deri më 17 maj. Përveç shfaqjes së finales së madhe, ata paralajmërojnë edhe një program të gjerë argëtues, detajet e të cilit do të bëhen të ditura më vonë. /Telegrafi/