Policia e Tiranës me anë të një lajmërimi për mediet në 28 shkurt njofton se nuk merr përsipër garantimin e zhvillimit të protestës të Partisë Demokratike, e cila do të zhvillohet ditën e sotme.
Efektivët shprehen se nuk e aprovon kërkesën për protestë nga ana e opozitës, për shkak se në protestat e kaluara është përdorur dhunë.
Kujtojmë se në protestat kombëtare të organizuara nga Partia Demokratike më herët, ka pasur akte dhune, me përdorim molotovësh, fishekzjarrësh dhe sulm ndaj forcave policore.
Njoftimi i policisë:
Tiranë
Përfaqësues të subjektit politik Partia Demokratike e Shqipërisë kanë njoftuar Policinë e Tiranës për zhvillimin e një tubimi, më datë 28.02.2026, në orën 18:00, para Kryeministrisë.
Nisur nga incidentet e ndodhura gjatë tubimit të mëparshëm, ku u evidentuan akte dhune dhe përdorim i mjeteve të rrezikshme ndaj punonjësve të Policisë, pjesëmarrja e personave të maskuar dhe përdorimi i të miturve në tubim, si dhe nga informacionet e siguruara mbi mundësinë e përsëritjes së veprimeve të tilla, Policia e Tiranës i ka kthyer përgjigje subjektit politik se nuk merr përsipër garantimin e zhvillimit të tubimit.
Pavarësisht përgjigjes së kthyer, Policia e Tiranës, në përmbushje të detyrave funksionale, ka marrë të gjitha masat për garantimin e rendit dhe sigurisë publike në qytetin e Tiranës, mbrojtjen e institucioneve shtetërore, si dhe për lëvizjen e lirë të automjeteve dhe qytetarëve, në rast se tubimi do të zhvillohet.
Policia e Tiranës apelon për qytetarët që, nëse ndeshen me veprime të dhunshme, të distancohen dhe të denoncojnë çdo paligjshmëri që konstatojnë.
Kreu i PD-së Sali Berisha ka deklaruar se kjo do të jetë protesta më e madhe kombëtare e zhvilluar ndonjëherë nga opozita. Ai deklaron se PD është tashmë në “kilometrin e fundit” të rrëzimit të regjimit të Ramës.
