Prokuroria kërkon pesë vjet burg për Dodikun

Prokuroria e Bosnjë dhe Hercegovinës kërkoi në seancën përfundimtare më 19 shkurt që Gjykata e Bosnjë dhe Hercegovinës ta dënojë me pesë vjet burg presidentin e Republikës Serbe, Millorad Dodik, dhe t’i ndalojë atij veprimtarinë politike për dhjetë vjet. Po ashtu, kërkohet dënim maksimal për Millosh Llukiqin, ushtrues detyre i drejtorit të Gazetës Zyrtare të Republikës Serbe.

Të dy janë akuzuar për mosrespektim të vendimeve të Përfaqësuesit të Lartë, Christian Schmidt, dhe mund të përballen me deri pesë vjet burg dhe ndalim të veprimtarisë politike.

Dodik është akuzuar për nënshkrimin e dekreteve që shpallën të vlefshme dy ligje jokushtetuese të Republikës Serbe, të cilat ishin anuluar nga Përfaqësuesi i Lartë. Llukiq akuzohet për publikimin e këtyre ligjeve dhe dekreteve, të cilat e kundërshtojnë zbatimin e vendimeve të Përfaqësuesit të Lartë dhe të Gjykatës Kushtetuese të Bosnjë dhe Hercegovinës në territorin e Republikës Serbe.

Dodik i quajti veprimet si një luftë për sovranitetin e Bosnjë dhe Hercegovinës dhe e akuzoi Schmidt për paligjshmëri. Ai vazhdoi të theksojë se nuk ka asnjë vendim të institucioneve që të legjitimojnë rolin e Schmidt si Përfaqësues i Lartë dhe argumentoi se ai nuk ka të drejtë të ndryshojë ligjet, shkruan klix.ba.

Dodik e përshkroi si të ilegal rolin e Schmidt dhe nënvizoi se ai vetë, si president i Republikës Serbe, është kategori kushtetuese. Po ashtu, ai sugjeroi se Prokuroria duhet të padisë Përfaqësuesin e Lartë për shkelje të Kushtetutës.

Mbrojtja e Dodikut dhe Llukiqit deklaroi se veprat për të cilat ata janë akuzuar nuk kanë pasoja ligjore, pasi ligjet e kontestuara janë anuluar dhe asnjë akt nuk ka mbetur në fuqi. Ata theksuan se refuzimi për të nënshkruar dhe publikuar dekretet do të kishte çuar në shkeljen e Kushtetutës së Republikës Serbe, dhe se në këtë rast ata do të përballeshin me dënime më të rënda.

Ndërkohë, vendimi i gjykatës mund të shpallet menjëherë pas fjalës përfundimtare ose brenda tre ditëve, me mundësinë e apelimit nga të dy palët.

Në pritje të vendimit, ka pasur një rritje të pranisë policore, ndërsa mbështetësit e Dodikut kanë protestuar para Gjykatës.

Presidenti serb, Aleksandar Vuçiq dhe kryeministri hungarez, Viktor Orban, kanë bërë thirrje për ndalimin e dënimit të Dodikut, duke shprehur shqetësimin për mundësinë e destabilizimit të rajonit. /Telegrafi/