Pro dhe kundër shtetit të bektashinjve, qytetarët në Shqipëri: E gjitha po bëhet për para

Krijimi i një shteti sovran të urdhrit bektashi në vend synon të ofrojë një hapësirë si ajo e Vatikanit për bektashinjtë si dhe një mënyrë për të promovuar tolerancën fetare në Shqipëri.

Por si është pritur nga qytetarët kjo iniciativë?

“Ky do ta kthejë gjithë Shqipërinë në vend islamik, kështu që kurrë nuk do të hyjë në Evropë Shqipëria. Ç’punë kemi ne, gjithsekush ka fenë e vet…”, thotë një qytetar.

“Unë jam i mendimit të krijojmë dhe një shtetin afrikan të Shqipërisë”, ironizon një tjetër.

Për disa qytetarë të tjerë, krijimi i një shteti të tillë është mënyra më e mirë për t’i treguar botës harmoninë fetare në Shqipëri.

“Duhet, se kryegjyshi është faktor dhe kudo që shkojmë këta janë më të pasur, harmonia fetare duhet të jetë dhe këto janë çelësi…”, thotë një qytetar.

Në reagimin e fundit për mediat, Kryegjyshata shprehet se e mirëpret nismën e kryeministrit si dhe ka dhënë detaje për mënyrën sesi do të funksionojë shteti.

Sipas Kryegjyshatës çështja e shtetësisë apo pasaportave do të kufizohet vetëm tek anëtarët e klerit dhe individët në administratën e shtetit.

Drejtues më i lartë do të jetë kryegjyshi, si dhe vendimet administrative dhe fetare do të merren nga një këshill.

Kryegjyshata ka publikuar dhe të dhënat e para për administratën e shtetit, duke nisur që nga emali zyrtar media@bektashistate.org.