Politikanët zviceranë fitojnë miliona euro në vit nga këshillat e tyre për sektorin financiar

Deputetët dhe senatorët zviceranë fitojnë 5.85 milionë euro apo 6.5 milionë franga nga pozicionet në sektorin e financave dhe të sigurimeve.

Sipas një studimi që shikon konfliktet e mundshme të interesit midis parlamentarëve zviceranë, politikanët në Dhomën e Ulët dhe të Sipërme të Parlamentit mbledhin rreth 5.1 milionë franga nga pozicionet e sektorit të financave, ndërsa ata fitojnë 1.4 milionë franga nga ai i sigurimeve.

Autorët e studimit thonë se pothuajse gjysma e atyre parave fitohen nga deputetët dhe senatorët me Liberalët e Qendrës së Djathtë (FDP), ndërsa Partia Popullore Zvicerane (SVP) e krahut të djathtë përbën 25 për qind dhe CVP konservatore 19 për qind.

Pjesa tjetër e partive të Zvicrës marrin vetëm pesë për qind të këtyre parave nga sektorët e financave dhe të sigurimeve.

Studimi u krye nga dy ekspertë të pavarur dhe i porositur nga deputeti socialist Cédric Wermuth dhe bazohet në të dhëna të arritshme publikisht, si dhe intervista me ekspertë të industrisë dhe ekzaminim të raporteve të ndërmarrjeve, shkruan The Local, përcjell Telegrafi.

Për dallim nga shumë vende të tjera, një numër i madh parlamentarësh zviceranë janë politikanë jo profesionistë dhe vazhdojnë të mbajnë punë ose role të tjera me organe profesionale të industrisë.

Një vështrim në listën e interesave të deklaruara tregon se këta politikanë kanë role të jashtme, madje edhe shumë avokatë.

Sipas rregullave parlamentare të Zvicrës, deputetët dhe senatorët janë të detyruar të zbulojnë interesat e tyre të biznesit, duke përfshirë vendet e punës ose pozicionet e bordit të mbajtur, por nuk kanë nevojë të zbulojnë se sa fitojnë.

Transparenca Ndërkombëtare beson se kjo rrit rrezikun e korrupsionit në sistem. Sidoqoftë, politikanët me punë në industrinë e sigurimeve i thanë Sonntags Blick, se votimi i tyre në parlament mbetet i pavarur. /Telegrafi/