Policia në Gjilan gjobit një qytetar me 500 euro për tejkalim të shpejtësisë – apelon për kujdes të shtuar në trafik

Njësiti Rajonal i Komunikacionit Rrugor nga Drejtoria Rajonale e Policisë në Gjilan ka shqiptuar një gjobë në vlerë prej 500 euro ndaj kundervajtësit i cili është regjistruar duke vozituar me shpejtësinë 175km/h në zonën ku kufizimi i shpejtësisë është 60km/h.

Po ashtu, në njoftim theksohet se gjatë javës së fundit janë shqiptuar 11 gjoba kundërvajtëse dhe masa e përkohshme të ndalim drejtimit të mjeteve për 11 kundërvajtëse.

“Gjatë javës së fundit janë shqiptuar edhe njëmbëdhjetë (11) gjoba kundërvajtëse dhe masa e përkohshme të ndalim drejtimit të mjeteve motorike për njëmbëdhjetë (11) kundërvajtëse të cilët gjatë patrullimit me veturën me pajisje inteligjente janë hasur duke: tejkalim në vijë të plotë, tejkalim i shpejtësisë së kufizuar të lëvizjes e kundërvajtje të tjera të parapara me ligjin për rregullat në trafikun rrugor”, thuhet në njoftim.

Me qëllim parandalimin e aksidenteve në trafik, Drejtoria Rajonale e Policisë në Gjilan apelon tek të gjithë ngasësit që të respektojnë dispozitat ligjore në trafik.

“Uleni shpejtësinë, mos përdorini telefonin gjatë vozitjes, vendosni rripin e sigurimit, keni kujdes ndaj këmbësorëve, mos e neglizhoni sinjalistikën rrugore dhe semaforët. Siguria në rrugë është përgjegjësi e përbashkët”, theksohet tutje në njoftim. /Telegrafi/