Policia e Kosovës ka vendosur të mos kursejë nga gjobat të gjithë ata vozitës që po kalojnë me vetura në rrugën “Xhorxh Bush” në Prishtinë.
Aktualisht në këtë rrugë janë duke vazhduar punimet për shndërrimin e kësaj pjese në shesh.
Nga Komuna e Prishtinës kanë bërë të ditur se gjoba për qytetarët të cilët kalojnë me veturat e tyre private në këtë rrugë do të jetë 500 euro si dhe për një vit marrja e patente shoferit.
Lidhur me shqiptimin e gjobave Telegrafi ka pyetur në Policinë e Kosovës të cilët kanë njoftuar se sot zyrtarisht ka filluar kjo procedurë.
“Në hyrje te rrugës “Xhorxh Bush”, kemi të vendosura dy patrulla policore, me qellim te marrjes së masave preventive si dhe ato te ndëshkimit për ngasësit qe nuk respektojnë shenjat e trafikut. Njësiti i Trafikut të Qytetit, në ditët e para ka dhënë vetëm vërejtje, sot ka filluar me shqiptimin e gjobave për ata që e kanë të ndaluar dhe hyjnë në zonën në fjalë, dhe deri tani janë shqiptuar 68 tiketa”, kanë deklaruar nga policia për Telegrafin.
Më tej është bërë e ditur se gjoba është sipas ligjit mbi komunikacionin rrugor, për mos respektim të shenjave te trafikut, 40 euro ndërsa tejkalimi i vijës se plote është dënimi 150 dhe konfiskimi patentë shoferit për 3 muaj.
Vetëm taksitë, autobusët dhe automjetet emergjente (policia, zjarrfikësit dhe autoambulancat) mund të lëvizin në këtë rrugë. /Telegrafi/
