Autoritetet meksikane thanë të dielën se të paktën pesë persona vdiqën dhe tre të tjerë u plagosën pasi një makinë shpërtheu pranë një stacioni policie në shtetin e trazuar perëndimor të Michoacan.
Shpërthimi ndodhi pak para mesditës sipas orës lokale të shtunën përpara selisë së policisë në qytetin bregdetar të Coahuayana, sipas Zyrës së Prokurorit të Përgjithshëm të Meksikës, e cila ka marrë përsipër hetimin e çështjes.
Zyra e prokurorit të shtetit e rriti numrin fillestar nga tre viktima fatale në pesë, duke shtuar se tre prej tyre ishin oficerë policie lokale, shkruajnë mediat e huaja, përcjell Telegrafi.
Sipas Héctor Zepeda, komandant i policisë së komunitetit, shpërthimi ishte aq i fuqishëm sa mbetjet njerëzore u shpërndanë në të gjithë zonën.
Të paktën tre nga gjashtë kartelet e drogës që administrata Trump i ka cilësuar si organizata terroriste - Jalisco New Generation, United Cartels dhe The New Michoacan Family - veprojnë në Michoacan, përveç një mori grupesh të armatosura vendase, disa të mbështetura nga Karteli Sinaloa.
Vrasja e kryetarit të bashkisë së Uruapanit, Carlos Manzo, në Michoacan, shkaktoi dy ditë demonstrata të udhëhequra nga të rinjtë në nëntor, me protestuesit që i vunë flakën ndërtesave publike dhe u përleshën me policinë, duke rezultuar në mbi 100 të plagosur.
Manzo, 40 vjeç, kishte fituar popullaritet si një “kryqëzatë kundër krimit të organizuar” dhe bëri fushatë për të luftuar kartelet famëkeqe të drogës në Meksikë.
Përdorimi i eksplozivëve - të hedhur nga dronë, të varrosur si mina ose të fshehur përgjatë rrugëve - ka qenë një teknikë gjithnjë e më e zakonshme e përdorur nga grupet kriminale në rajon, megjithëse nuk është tipike që ato të vendosen në makina.
Shpërthimi ndodhi ndërsa guvernatori i shtetit, Alfredo Ramírez Bedolla, po merrte pjesë në një ngjarje publike me Presidenten Claudia Sheinbaum në Mexico City për të festuar shtatë vjet qeverisje nga partia në pushtet Morena.
Për dy dekada, grupe të ndryshme të krimit të organizuar kanë luftuar për kontrollin e territorit sepse Michoacán është një portë hyrëse për substancën kimike të përdorur në prodhimin e drogave sintetike. /Telegrafi/
