Për një vit Posta e Kosovës harxhon 10.57 milionë euro për shpenzime operative

Posta e Kosovës nuk po arrin të sigurojë të hyra më të mëdha sesa shpenzimet, madje në këto dy kategori po u bëhet një përafrim i madh.

Në një raport financiar të kësaj ndërmarrjeje, të cilin e ka siguruar Zëri, bëhet e ditur se realizimi i të hyrave nga janari deri në dhjetor të vitit të kaluar kap shumën e 11 milionë e 850 mijë e 979 eurove.

Ndërsa ndryshe nga realizimi i të hyrave shpenzimet për periudhën e njëjtë kanë arritur në 10 milionë e 571 mijë e 777 euro. Ky realizim i të hyrave në periudhën e njëjtë janar-dhjetor të vitit 2016 figuron të ketë qenë 12 milionë e 213 mijë e 65 euro.

Por ankesat e renditura në këtë raport për mosrealizim të planit të të hyrave prej 100 për qind thuhet se janë për shkak të rënies së vazhdueshme të produkteve të Telekomit, të cilat kanë ndikuar në mosrealizimin e planit të të hyrave për vitin e kaluar.

“Gjatë vitit 2017 Posta ka pasur një rezultat në të hyrat që janë realizuar në shumën prej 11.850.979.00 eurosh, ndërsa gjithsej të hyra të planifikuara në periudhën janar – dhjetor 2017 ishin 12.064.843.00 euro. Nga kjo shihet se kemi realizim të planit të të hyrave prej 98 për qind. Mosrealizimin prej 2 për qind e ka shkaktuar rënia e vazhdueshme e produkteve të Telekomit, që ka ndikuar drejtpërsëdrejti në mosrealizimin e planit të të hyrave për vitin 2017”, theksohet në mes të tjerash në raport.

Ndërsa, vetëm shpenzimet e realizuara nga personeli gjatë periudhës së njëjtë kapin vlerën e 9 milionë e 52 mijë e 322 eurove.

“Shpenzimet e personelit janar-dhjetor 2017 sipas ERP-së janë 9,052,322 euro e që duke i krahasuar me ato të planifikuara janë për -3 për qind më të ulëta, ndërsa krahasuar me vitin e kaluar janë përafërsisht të njëjta”. /Zëri/