Incident me armë zjarri në Pejë: Gjatë patrullimit rutinë, polici sheh gëzhoja dhe njolla gjaku në rrugë

Pasditen e së mërkurës, një incident me armë zjarri ka ndodhur në rrugën “Bill Clinton” në Pejë, pranë Spitalit të Verbërve.

Zëdhënësi i Policisë për rajonin e Pejës, Fadil Gashi, ka bërë të ditur se një zyrtar policor, gjatë një patrullimi rutinë, ka vënë re gëzhoja dhe njolla gjaku në vendngjarje.

Ai menjëherë ka njoftuar njësitë policore, të cilat kanë mbërritur shpejt për të hetuar rrethanat e ngjarjes.

Sipas Gashit, ngjarja është raportuar rreth orës 14:52.

Aktualisht, policia është e angazhuar në hetimin e rastit dhe po punon për të zbuluar më shumë detaje lidhur me incidentin.

“Rreth orës 14: 52 minuta një zyrtar policor i cili derisa ishte duke ecur në rrugën “Bill Clinton” në afërsi të Spitalit të verbërve ka hasur në disa gëzhoja dhe njolla të gjakut. Zyrtari policor menjëherë ka njoftuar policinë dhe në vend ngjarje kanë dalë njësitet policore, të cilët janë duke u marrë me rastin. Tani për tani kemi vetëm këto të dhëna dhe se po merremi me rastin”, ka deklaruar Gashi./Telegrafi/