PDK: Skandali me ambasadorin Berishaj lidhet me majat e institucioneve, duhet hetim i hollësishëm

Nënkryetarët e Partisë Demokratike të Kosovës (PDK), Vlora Çitaku dhe Uran Ismaili sot në një konferencë për media kanë folur rreth skandalit që e quajtën “Karteli i Rrymës”, në të cilin është përfolur emri i ambasadorit të Kosovës në Kroaci, Martin Berishaj.

Ismaili në një konferencë për media ka thënë se kjo aferë lidhet me majat e institucioneve dhe partisë në pushtet, prandaj, ka kërkuar hetim të hollësishëm parlamentar të kësaj çështje.

“Sot jemi këtu për të ngritur zërin në emër të qytetarëve dhe për të dënuar aferën e ‘Kartelit të Rrymës’, që tani ka depërtuar në majat më të larta të institucioneve dhe të partisë në pushtet. Ne kemi pasur një kërkesë të vazhdueshme për të themeluar një Komision Parlamentar Hetimor, që do të hetonte procesin e shpenzimit të 100 milionë eurove të dedikuara për blerje të rrymës. Kjo e drejtë kushtetuese e deputetëve e penguar nga kryeministri Kurti dhe bashkëpunëtorët e tij, ka për qëllim që të mbajnë larg dritës kontratat e shitblerjes së rrymës, sepse, kështu do të zbulohej rrjedha e parasë si dhe lidhjet potenciale të ‘Kartelit të Rrymës’ me bashkëpunëtorët e kryeministrit Kurti”, u shpreh Ismaili.

Ai tha më tej se kjo duket të jetë vetëm fillimi i një bunari të thellë korruptiv, ku sipas tij miliona euro të qytetarëve janë shpërndarë në transaksione me kompani serbe.

“E për më keq, ka dyshime të mëdha për transaksione edhe me kompani ruse. Prandaj, një hetim parlamentar ku do të përfshiheshin deputetët e pozitës dhe opozitës, tani është interes kombëtar. Komisioni parlamentar, i përbërë nga ekspertë e anëtarë të shoqërisë civile, ku të gjithë së bashku do të hetonim se ku, si dhe kujt u janë dhënë këto miliona euro të taksave tona”, ka thënë nënkryetari i PDK-së, Ismaili.

Ai po ashtu u shpreh se KEK-u ka shitur energji elektrike Kompanisë GEN-I me çmim prej vetëm 105 euro për megavat.

“Të gjeturat tregojnë se në janar të këtij viti, atë kohë kur Qeveria me paaftësinë e saj e zhyti vendin në krizë energjetike, raportohet se KEK-u ka shitur energji elektrike Kompanisë GEN-I me çmim prej vetëm 105 euro për megavat. Në të njëjtën periudhë, KEK-u ka blerë energji elektrike nga kompania me seli në Beograd me një çmim prej 255 euro për një megavat”.

Lexo po ashtu Akuzat për eksport të energjisë në periudhën e krizës, KEK del me deklaratë

“Pra, Kosova ka blerë shtrenjtë, e Beogradit i ka shitur lirë. Ajo që tani dihet është që gjatë muajit dhjetor dhe janar, për dy muaj, është blerë energji elektrike në vlerë prej 4.2 milionë euro  nga kompania  GEN-I me seli në Serbi, e nga dëshmitë që janë zbardhur nga mediumet sllovene paraqitet lidhja se Martin Berishaj është paguar rreth 600 mijë euro nga kjo kompani”, ka thënë më tej ai.

Siç tha Ismaili, ambasadori i Kosovës e ka mbajtur sekret kompaninë në fjalë.

“I njëjti nuk e ka deklaruar as në formularin e deklarimit të pasurisë”.

Prandaj, sipas nënkryetarit të PDK-së, është shumë shqetësuese niveli i shtrirjes së skandalit, që përfshinë shumë institucione: prej Ambasadës së Kosovës në Kroaci, Ministrisë së Punëve të Jashtme, Ministrisë së Financave, Ministrisë së Ekonomisë, deri te kupola e gjithë këtij rrjeti: Kryeministri dhe Presidentja e Republikës së Kosovës.

Edhe nënkryetarja e PDK-së, Vlora Çitaku tha se qeveria dhe presidenca nuk janë as gjykatës as prokuror, por siç u shpreh ajo ata duhet të ndërmarrin hapa institucional dhe politik për shkarkimin e Berishës.

“Në një kohë ku për shkak të rrethanave përtej nesh e jashtë kontrollit tonë është krijuar një mundësi e artë për anëtarësimin e Kosovës në Këshillin e Evropës, për shkak të përjashtimit të Rusisë nga ky mekanizëm i rëndësishëm ndërkombëtar, në vend se të gjitha resurset tona politike dhe diplomatike të jenë në funksion të jetësimit të këtij qëllimi madhor, diplomacia e Kosovës duket të jetë e përfshirë në një aferë me përmasa rajonale.

Berisha ka jetuar në Slloveni dhe ka hapur xhirollogari bankare dhe biznes në Mal të Zi e skandali ka shpërthyer në Slloveni. Qeveria dhe Presidenca nuk janë as gjykatës as prokuror, ata duhet të ndërmarrin hapa institucional dhe politik për shkarkimin e Berishës si ambasador.

Nga dje Berisha nuk do të jetë në gjendje të ushtroj punën e tij, fatkeqësisht ua ka bërë të vështirë edhe punën ambasadorëve tanë…shkarkimi as që duhet të diskutohet. Kemi disa pyetje: Si e ka marr Berisha shtetësinë një ditë para se të bëhet ambasador? A ka kaluar nëpër hallkat e sigurisë? A ka kaluar për verifikim nga AKI dhe si është marr ky verifikim? Nuk e kemi luksin për skandale të tilla”, ka thënë ndër të tjera Çitaku.

Ajo ka folur edhe për dialogun Kosovë-Serbi, ku tha se dialogu nuk duhet të kthehet në çështje të targave e stikersave.

“Kjo tregon një mungesë konsistence, ideje, vizioni. Problemi nuk janë targat por njohja reciproke, nuk duhet ta kthejmë dialogun në targa e stikersa”, ka thënë Citaku. /Telegrafi/