Partia Demokratike e Kosovës është deklaruar sot lidhur me ftesën që Shtetet e Bashkuara të Amerikës ia kanë dërguar përfaqësuesve të Republikës së Kosovës dhe atyre të Beogradit për takim më 27 qershor në Washington, në kuadër të dialogut Kosovë-Serbi.

Zëdhënësi i PDK-së, Avni Bytyçi ka thënë se institucionet duhet ta përfaqësojnë vendin në mënyrën më të mirë, e kanë për detyrë t’i mbrojnë interesat e vendit dhe nuk duhet t’i ikin përgjegjësisë dhe bashkëpunimit me Amerikën sikurse veproi ish qeveria Kurti.

“Sa i përket ftesës për të vazhduar dialogun në Shtëpinë e Bardhë, qëndrimi i Partisë Demokratike të Kosovës është i njohur dhe është bërë i ditur në vazhdimësi nga kryetari Kadri Veseli. Nuk ka asnjë ndryshim qëndrimi deri sot. Aty ku janë Shtetet e Bashkuara të Amerikës, duhet të jetë Republika e Kosovës dhe institucionet ta përfaqësojnë vendin në mënyrën më të mirë. E kanë për detyrë t’i mbrojnë interesat e vendit dhe nuk duhet t’i ikin përgjegjësisë dhe bashkëpunimit me Amerikën sikurse veproi ish qeveria Kurti”, ka shkruar Bytyçi në Facebook. /Telegrafi/