Pasi u depërtua nga Izraeli, Thunberg pritet me duartrokitje dhe brohoritje në Greqi
Greta Thunberg është dëbuar nga Izraeli së bashku me disa anëtarë të tjerë të flotës së Gazës, të cilët pretendojnë se iu nënshtruan abuzimit brutal fizik dhe verbal nga forcat izraelite gjatë kohës që ishin në paraburgim.
Mbi 70 aktivistë, avokatë dhe gazetarë të kombësive të ndryshme u deportuan nga Izraeli pasi u kapën në bordin e një flote ndihmash për Gazën, transmeton Telegrafi.
Disa tani kanë pretenduar se kanë pësuar një valë abuzimesh nga forcat izraelite, duke filluar nga privimi nga gjumi dhe ilaçet deri te rrahjet, si dhe duke u drejtuar pushkë automatike në kokat e tyre.
Ata gjithashtu kanë thënë se u janë vënë qen mbi ta, janë detyruar të flenë në dysheme, nënshtruar fyerjeve dhe janë detyruar të shikojnë pamje nga sulmet e Hamasit ndaj Izraelit më 7 tetor 2023.
Por një numër anëtarësh të tjerë të flotës thanë se kanë vënë re se forcat izraelite duket se e kanë synuar Thunberg për trajtim më të ashpër.
Aktivisti turk Ersin Çelik, i cili mori pjesë në Flotën e Lirisë, tha: "Ata e tërhoqën Gretën e vogël [Thunberg] nga flokët para syve tanë, e rrahën dhe e detyruan të puthte flamurin izraelit. Ata i bënë gjithçka të imagjinueshme asaj, si një paralajmërim për të tjerët”.
Lorenzo D'Agostino, një gazetar italian, shtoi: "E pashë me sytë e mi se ata varën një flamur izraelit mbi të ndërsa ushtarët bënin selfie me të. Greta është një grua e fortë dhe e guximshme, por gjatë ndalimit ajo dukej thellësisht e tronditur".
Shumica, nëse jo të gjithë, e atyre që u liruan nga paraburgimi izraelit do të fluturonin për në Greqi, ku do të jenë në gjendje të marrin fluturime për në vendet e tyre të origjinës, thanë qeveritë e tyre përkatëse të dielën.
Greta është pritur me duartrokitje dhe brohoritje në Greqi, ku shumë prej të pranishmëve i dhuronin lule dhe pritej si një heroinë. /Telegrafi/
