Panairi i librit në Frankfurt, Kosova përfaqësohet denjësisht

Pas ceremonisë së hapjes zyrtare të panairit të librit të Frankfurtit, dje nisi vargani i vizitorëve drejt stendave impozante të këtij panairi me mbi 7,100 botues të më se 100 shteteve të botës.

Pa dyshim ajo që bie në sy për të mirë që në ditën e parë të panairit është vizitueshmëria e theksuar – sidomos në stendën fort mirë të Kosovës në sallën 5.0 me numër D 133.

Sipas katalogut të Shoqatës së Botuesve të Kosovës (SHBK-së), botuar në vigjilje të këtij panairi, marrin pjesë më se 25 botues të Kosovës, me mbi 200 tituj, nga të cilët më se 100 janë të rinj, botuar brenda dy panaireve.

Botues pjesëmarrës që nga Akademia e Shkencave dhe e Arteve e Kosovës, janë edhe Buzuku, Koha, Mendimi Pozitiv, Dija, Pema; deri tek ata që së bashku kontribuojnë në afirmimin kombëtar dhe ndërkombëtar të librit shqip.

Ministria e Kulturës, Rinisë Dhe Sportit e Kosovës, sivjet ka mbështetur financiarisht shpenzimet rreth stendës, qirasë, pajisjet dhe promovimin kulturor në aspektin më të shëndoshë në fushën e librit.

Vetë fakti se në ditën e parë kërkohen botime specifike që bashkatdhetarët tanë, duke filluar nga veprat e autorëve bashkëkohorë shqiptarë e deri tek përkthimet e autorëve botërorë, të cilët janë emra që nobelët e fundit e deri tek bestsellerët botërorë, botimet e Buzukut, Kohës, Pemës plotësojnë kriteret e një përfaqësimi më se dinjitoz.

Aty mund të shihen posterët e librave më të rinj të Veton Surroit, romanit “Përcaktimi i dashurisë i Marie Gjonit”, apo vëllimi studimor i Kujtim M. Shalës, “Epistemologjia e dytë”, si dhe të autorëve si Adem Gashi, Ilirie Zajmi, Jakup Krasniqi, Kasëm Trebeshina, Roland Gjoza…; deri tek të huajt Patrick Modiano (12 tituj), Svetlana Aleksievic (3 tituj), Mathias Enard, Edouard Louis, Jennie Dorny, Lucie Leanne, Juan Assensio…

Mbase pos Kujtesës së Rugovës, stenda e Kosovës kujton edhe përkthyesin e sapondarë nga jeta, prof. dr. Masar Stavilecin me përkthime të dy nobelistëve francëzë: Jean-Paul Sartre dhe Patrick Modiano si dhe monografia e ASHAK, Gjelosh Gjokaj…

Vizita e përfaqësuesve të Konsullatës së Kosovës në Frankfurt dëshmon interesim e diplomacisë shtetërore për të pasur Kosova një prezantim sa më dinjitoz në një nga ngjarjet më të mëdha të fushës së librit të botës, Panairin e librit të Frankfurtit.