Pak ditë pasi u godit nga një tërmet me magnitudë 7.0, Kalifornia goditet nga tornado

Të paktën katër persona u plagosën pasi një tornado goditi veriun e Kalifornisë, kanë njoftuar autoritetet lokale.

Bëhet e ditur se tornado rrotulloi disa vetura dhe dëmtoi linjat e energjisë në Scotts Valley, që ndodhet rreth 89 km në jug të San Franciskos.

Shërbimi Kombëtar i Motit (NWS) tha se tornado ishte kategorizuar si EF1, një nga klasifikimet më të dobëta dhe se zgjati rreth pesë minuta.

Më herët, banorëve të San Franciskos iu dha një paralajmërim për tornado për herë të parë ndonjëherë, pasi stuhitë përfshinë rajonin.

Shërbimi lokal i zjarrfikësve njoftoi se të paktën katër persona ishin lënduar dhe të paktën dy prej tyre ishin dërguar në spital, shkruan BBC, përcjell Telegrafi.

Shpejtësia e erës vlerësohet të ketë arritur kulmin në rreth 145 km/h, sipas NWS.

Raportohet se më shumë se një milion banorë u zgjuan në San Francisko dhe periferitë e tij me alarme në telefonat e tyre, duke i paralajmëruar ata që “të strehohen”.

Ndryshe, vendi pa një tornado për herë të fundit në vitin 2005.

Në afërsi të San Mateo County u lëshua për herë të fundit një paralajmërim për tornado në 2011.

Paralajmërimi erdhi pasi një stuhi e fuqishme kaloi gjatë natës – pemët u rrëzuan dhe pati ndërprerje të mëdha të energjisë elektrike.

Ndërsa tani, më shumë se 50,000 klientë janë ende pa energji përgjatë bregut verior dhe qendror të Kalifornisë.

Paralajmërimi për tornado në San Francisko erdhi vetëm një javë pasi qyteti pa paralajmërimin e parë të cunamit pas tërmetit me magnitudë 7.0 që goditi brigjet veriore të shtetit. /Telegrafi/