Pacolli paralajmëron arrestimin e zyrtarëve serbë nëse futen në territorin e Kosovës

Zëvendëskryeministri dhe Ministri i Punëve të Jashtme të Kosovës, Behgjet Pacolli ka paralajmëruar arrestimin e zyrtarëve serbë Aleksandër Vulin dhe Marko Gjuriq, nëse të njëjtit futen në territorin e Kosovës pa leje zyrtare.

Pacolli përmes një postimi në Facebook ka thënë se leje për të hyrë në territorin e Kosovës ka pasuar paraprakisht vetëm Ministri i Punëve të Brendshme të Serbisë, Nebojsha Stefanoviq, por të njëjtit i është revokuar.

“Nebojsha Stefanoviq ka pasur leje por i është revokuar ndërsa Marko Gjuriq nuk ka leje deri më sot. Pra për të hyrë sot në Kosovë nuk kanë leje asnjëri prej tyre. Nëse ministrat serb futen në territorin e Kosovës ata do të arrestohen”, ka shkruar Pacolli.

Lexo po ashtu Policia në Jarinje, për t'ua ndaluar hyrjen në Kosovë zyrtarëve serbë Vulin dhe Gjuriq (Foto)

Ndërkaq Policia e Kosovës ka shtuar forcat e saja në veri të Mitrovicës në pikën kufitare në Jarinje, për të ndaluar hyrjen e zyrtarëve serbë në territorin e Kosovës.

“Policia e Kosovës bazuar në planifikimet e saja policore, në zbatim të vendimit të Ministrisë së Punëve të Jashtme të Republikës së Kosovës (RKS) për ndalim të vizitës në Kosovë të zyrtarëve serbë Vulin dhe Gjuriq, ka angazhuar njësi relevante policore për implementim të këtij vendimi.

Sipas informacioneve dhe deklarimeve të vetë zyrtarëve serbë, të njëjtit kanë deklaruar se edhe përkundër vendimit zyrtar të autoriteteve të Kosovës për ndalim të hyrjes së tyre, ata do të realizojnë vizitën e tyre të planifikuar në veri të Mitrovicës”, thuhet në njoftim e policisë. /Telegrafi/