Vendosja strategjike në vendet ku dyshoni se brejtësit hyjnë mund të jetë linja e parë e mbrojtjes së shtëpisë suaj këtë dimër
Rënia e temperaturave dhe ardhja e periudhës së ftohtë nuk ndikojnë vetëm te njerëzit, por edhe te bota shtazore, veçanërisht te brejtësit. Në kërkim të një strehe të ngrohtë dhe një vendi për të dimëruar, minjtë dhe brejtësit shpesh i zgjedhin banesat njerëzore si objektivin kryesor.
Prania e brejtësve në hapësirat e banimit mund të shkaktojë shqetësim dhe pasiguri. Edhe pse reagimi instinktiv i shumë pronarëve është përdorimi i kurtheve mekanike ose helmeve të forta kimike, ekspertët bëjnë thirrje për kujdes. Këto metoda mund të paraqesin rrezik për anëtarët e tjerë të familjes, veçanërisht nëse në shtëpi ka fëmijë të vegjël ose kafshë shtëpiake që mund të vijnë në kontakt të drejtpërdrejtë me substanca toksike.
Përdorimi i repelentëve aromatikë
Ekspertët e kontrollit të dëmtuesve nga kompania Summit Environmental Solutions kanë analizuar qasje të ndryshme dhe kanë identifikuar një sërë zgjidhjesh natyrore të provuara për largimin e brejtësve. Efektiviteti i këtyre metodave bazohet në karakteristikat biologjike të vetë kafshëve.
Duke qenë se minjtë dhe brejtësit kanë një shqisë jashtëzakonisht të zhvilluar të nuhatjes, disa aroma intensive të pranueshme për njerëzit, mund të jenë të padurueshme për ta. Prania e këtyre aromave në ambientin e shtëpisë krijon një mjedis irritues për brejtësit, duke i shtyrë ata të kërkojnë një vend tjetër për strehim, transmeton Telegrafi.
Repelentët natyrorë më të mirë
Në luftën kundër brejtësve përdoren më së shpeshti vajra esencialë dhe erëza me aromë të fortë. Disa nga më efektivët janë:
- Vaji i mentes (mentës së egër): Mentoli është tepër i fortë për hundët e ndjeshme të minjve.
- Uthulla: Aroma e saj e mprehtë vepron si repelent i fuqishëm.
- Karafili dhe kanella: Edhe pse na kujtojnë festat, për brejtësit janë mjaft të neveritshme.
Megjithëse repelentët natyrorë tregojnë një nivel të lartë efikasiteti, ekspertët theksojnë se mbështetja vetëm në një burim të vetëm aromash shpesh nuk është e mjaftueshme. Për rezultate optimale, këshillohet përdorimi i njëkohshëm i dy ose më shumë mjeteve natyrore të ndryshme.
Kur hapësira mbushet me një kombinim aromash intensive, brejtësit e perceptojnë zonën si të pasigurt dhe të papërshtatshme për jetesë. Kjo qasje ndikon drejtpërdrejt në shqisat e tyre dhe ul ndjeshëm gjasat e hyrjes dhe qëndrimit të tyre në objekt gjatë muajve të dimrit.
Ndani me ne në komente disa nga metodat tuaja për t’u përballur me mysafirët e padëshiruar. /Telegrafi
