Një ndeshje e nxehtë u zhvillua midis Benfica dhe Real Madridit në ndeshjen e parë të play-off-it të Ligës së Kampionëve, ku pati edhe shumë episode.
Vizitorët fituan 1-0 në Lisbonë me një gol të Vinicius Junior në minutën e 50-të. Festimi provokues i golit të brazilianit, i cili i solli atij një karton të verdhë, shkaktoi një rrëmujë në fushë.
Vinicius pretendon se më pas është abuzuar në mënyrë raciste nga lojtari i Benficas, Gianluca Prestianni, të cilin e raportoi te gjyqtari i ndeshjes, Francois Letexier, dhe te trajneri i Benficas, Jose Mourinho.
Gjyqtari aktivizoi protokollin dhe e ndaloi ndeshjen pas raportit, por ndeshja vazhdoi pa sanksione për Prestiannin.
Në kohën shtesë, ndodhi një skenë që u bë virale, ku akterë përsëri ishte Vinicius, por me mbrojtësin argjentinas, Nicolas Otamendi.
Gjatë një grindjeje verbale me Vinicius, Otamendi e provokoi kundërshtarin e tij duke i ngritur lart fanellën dhe duke i treguar tatuazhe të trofeve që kishte fituar, të cilat braziliani nuk i ka.
Otamendi i tregoi atij tatuazhet e Kupës së Botës, Copa America dhe trofeun e Finalissima, siç quhet ndeshja midis kampionëve të Evropës dhe Amerikës së Jugut. /Telegrafi/
