Osmani shtron Darkën e Lamës – të ftuar policia e familjarët e policëve të rënë në detyrë

Presidentja Vjosa Osmani këtë vit Darkën e Lamës e ka shënuar me Policinë e Kosovës në kampin “Enver Zymeri” në Mitrovicë, në shenjë mirënjohjeje për gratë e burrat në uniformë.

Në Facebook ka shkruar se në këtë organizim ishin edhe familjarët të policëve që ranë në detyrë, përfshirë familjen e heroit Afrim Bunjaku.

“Këtë vit festën e lashtë shqiptare, Darkën e Lamës, e shënuam bashkë me Policinë e Republikës së Kosovës, në kampin “Enver Zymeri”, në Mitrovicë, në shenjë mirënjohjeje, vlerësimi e falënderimi për gra e burra në uniformë, të cilët shërbejnë pa u lodhur për të na bërë të ndihemi të sigurt”.

“Në prani edhe të familjeve të policëve që kanë rënë në detyrë, përfshirë familjen e heroit Afrim Bunjaku, shprehëm mirënjohjen më të thellë të të gjithë qytetarëve të Republikës për ata që dhanë jetën në mbrojtje të çdo pëllëmbe të territorit të vendit tonë”, shkroi Osmani.

Darka e lamës e njohur edhe si darka e lamijeve, darka e fushës, darka e bereqetit, është një festë dhe ditë tradicionale e shënuar, që në fakt ka të bëjë me kremtimin e përfundimit të të korrurave të drithërave, e të korrave vjeshtore, e shtruar për të festuar vitin e bereqetshëm.

Ceremonitë dhe ritualet që bëheshin në këtë ditë, janë ruajtur të reduktuara vetëm në “Darkën e Lamës”.

Në Kosovë kjo është festë tradicionale që shënohet në fund të tetorit.

Festa e Darkës së Lamës së pari e organizoi presidenti Ibrahim Rugova në vitin 2002./Telegrafi/