Osmani ngushëllon familjen Dedushaj për ndarjen nga jeta të epidemiologut

Presidentja e Kosovës, Vjosa Osmani, ka shprehur ngushëllime të sinqerta për humbjen e Prof. Dr. Isuf Dedushaj, një prej personaliteteve më të shquara në fushën e epidemiologjisë, shkencës dhe arsimit mjekësor në Kosovë.

Me një postim në Facebook, Osmani theksoi se lajmi për ndarjen nga jeta të Prof. Dedushaj e ka tronditur thellë. Ajo e përshkroi Dedushajn si një njeri që la një kontribut të jashtëzakonshëm në zhvillimin e shëndetësisë dhe edukimit mjekësor në vend.

Lexo po ashtu Ndahet nga jeta Isuf Dedushaj, epidemiolog i njohur dhe ish-drejtor i IKSHPK-së

“Me pikëllim të thellë morëm lajmin për ndarjen nga jeta të Prof. Dr. Isuf Dedushaj, një prej personaliteteve më të shquara në fushën e epidemiologjisë, shkencës dhe sferës akademike. Ai do të kujtohet gjithmonë për kontributin e tij të jashtëzakonshëm në zhvillimin e shëndetësisë dhe edukimit mjekësor në Kosovë,” shkruan Osmani.

Presidentja shtoi se Dedushaj kishte një karrierë të pasur akademike dhe shkencore, duke lënë gjurmë të pashlyeshme si mjek, epidemiolog dhe profesor universitar.

Në përfundim, Osmani shprehu ngushëllimet e saj për familjen e të ndjerit dhe i uroi forcë për të përballuar këtë dhimbje të madhe. “I përhershëm qoftë kujtimi për Isuf Dedushajn!” ka përfunduar Presidentja. /Telegrafi/