Organizata “Youth Activism Center” tregon për sfidat me të cilat po ballafaqohen të rinjtë gjilanas

Organizata “Youth Activism Center -YAC” e dedikuar për fuqizimin dhe zhvillimin e të rinjëve në Gjilan, misioni i së cilës është të ofrojë një platformë gjithëpërfshirëse, tregon se të rinjtë tash e disa vite po ballafaqohen më një rënie të mungesa së përkrahjes së institucioneve lokale e nacionale.

Në një prononcim për Telegrafin, zëvendësdrejtori i kësaj organizate, Mejdi Sadiku ka thënë se të rinjtë e Gjilanit kanë mungesë të vendeve rekreative e mungesë të aktiviteteve më të shpeshta kulturore.

“Aktivizimi i të rinjve në Gjilan, çdo vit e më shumë është në rënie nga mungesa e përkrahjes së institucioneve lokale e nacionale. Të rinjtë e Gjilanit kanë mungesë të vendeve rekreative në Gjilan, mungesë të aktiviteteve më të shpeshta kulturore”, ka thënë Sadiku.

Gjithashtu, Sadiku thotë se në partneritet me organizatat ndërkombëtare përmes programit Erasmus+ të Komisionit Evropian, si organizatë janë duke kërkuar të rinj për shkëmbim përvojash me të rinjtë e vendeve evropiane.

“Ne përmes partneriteteve me organizatat ndërkombëtare përmes programit Erasmus+ të Komisionit Evropian, vazhdimisht jemi duke dërguar të rinj për shkëmbim përvojash me të rinjtë e vendeve të ndryshme evropiane, në mënyrë që të krijojnë mentalitet dhe frymëzim të punës dhe aktivizimit evropian”, ka thënë ndër të tjera ai.

Përveç shkëmbimit të përvojave të të rinjve gjilanas me ata evropian, organizata në të kaluarën ka pasur projekte edhe për grupet e margjinalizuara dhe ato në nevoje.

“Momentalisht nuk kemi diçka të veçantë për këto grupe, por në të kaluarën kemi pasur projekte në përkrahje të tyre. Po ashtu, iniciativa për rregullimin e disa problemeve lokale që i preokupojnë të rinjtë dhe qytetarët Gjilanas në përgjithësi”, ka thënë Sadiku.

Drejtuesi i kësaj organizate, thekson se përmes projekteve të ardhshme, kryesisht përmes trajnimeve dhe fushatave vetëdijësuese do të mundohen që t’iu ndihmojnë të rinjve gjilanas.

“Përmes projekteve të ardhshme, kryesisht përmes trajnimeve dhe fushatave vetëdijesuese e iniciativave do të mundohemi që të jemi të gatshëm t’i ndihmojmë kryesisht të rinjtë Gjilanas që të jenë të gatshëm për tregun e punës, të jenë të gatshëm ta ndihmojnë qytetin e Gjilanit e Kosovën në përgjithësi dhe të avokojnë në barazi mes gjithë komuniteteve”, ka theksuar Sadiku.

Organizata në bashkëpunim me organizatat e tjera lokale e ndërkombëtare, me këshillat e nxënësve si dhe me këshillat e studentëve të universitetit “Kadri Zeka”, krijon një komunitet ku te rinjtë ndihen të vlerësuar, të mbështetur dhe të frymëzuar për të bërë ndryshime pozitive.

Ndryshe, Qendra e Aktivizmit të Rinisë (Youth Activism Center – YAC) është organizatë e pavarur rinore që vepron në çdo fushatë të rinisë me qëllim të zhvillimit të shtetit të Republikës së Kosovës me anë të forcimit të kuadrove të reja në ngritje të kapaciteteve profesionale.

Gjithashtu, YAC synon që përmes Fushatave vetëdijësuese, monitorimit dhe publikimeve të informojë opinionin e gjerë mbi gjendjen momentale në sfera të ndryshme jetësore, të ngrisë kapacitetet e të menduarit të drejtë të shoqërisë, të bëjë zhvillimin e politikave publike dhe krijimin e mekanizmave përmes aktiviteteve për të çuar para vendin me vetëdijesim. /Telegrafi/