“Njeriu i Sharrit” në “PodGo”: Kam bërë revolucion me reklamat

Arsim Idrizi ose “Njeriu i Sharrit” është i ftuari i radhës në emisionin “PodGo”, me të cilin kemi diskutuar për tema të ndryshme. 

Bisedën e nisëm për profesionin e hoxhës. Arsimi tha se nuk dëshiron të identifikohet si hoxhë, duke thënë se ka të tjerë që kanë dhënë mund dhe janë të sinqertë. Ai foli edhe për atë se si duhet të jetë një hoxhë modern.

“Një hoxhë modern varet prej rrethanave, por esenca është e njëjtë, kushtet e Islamit janë 33 dhe nuk ndryshojnë. Por ndryshojnë metodat, varet prej rrethit kur ke studiuar. Unë kam studiuar në Turqi kur ajo ka qenë në maje në politikat globale dhe unë kam studiuar çfarë bëjnë këta që nuk bëjnë ne. Kisha profesor që vinin në ligjërata me syza, me çanta ajo më ka pëlqyer dhe normal jam ndikuar. Edhe ne kemi pasur hoxhallarët e mëhershëm të cilët kur janë kthyer nga vendet arabe na janë dukur shumë modern. Mua më pëlqen Ahmed Kalaja, Elvis Naçi, të cilët nuk kanë sekrete, ekspozohen me familjet dhe më pëlqen mënyra se si u qasen gjërave”, tha Arsimi.

Ndërsa në lidhje me reklamimin, fushë në të cilën ai është angazhuar shumë kohën e fundit, Arsimi tha se ka bërë revolucion.

“Reklama e biznesit është trend, ndoshta pas disa viteve do të diskutohet ndikimi i Njeriut të Sharrit në marketing, në hiking. Mendoj se kam bërë revolucion me reklamat. Mendoj se Maqedonia ka shumë pak njerëz dhe humbje të talenteve. Rrjetet sociale nuk na suportojnë si duhet. Më vjen keq pse në Maqedoni nuk ka emisione si në Shqipëri ose Kosovë, p.sh komedi ku do të marrin pjesë njerëzit, studentët, biznesmenët”, tha Arsimi.

Kurse sa i përket udhëtimeve të tij që i bënte në fillim, gjegjësisht udhëtimet “low cost”, ai tha se ato janë kurthe dhe se ka harxhime të tjera para se të udhëtosh.

“Udhëtimet low cost janë kurthe. Janë të vërteta, por para se të shkosh në udhëtim low cost, duhet të harxhosh shumë para për t’u blerë pajisjet. P.sh nëse udhëtosh me veturë, nuk mund të nisesh me çfarëdo veture, por sërish kjo nuk futet në harxhimet e pushimeve. Nuk mund të shkosh në kamping me pajisje të lira. Por nëse i marrim harxhimet vetëm kur shkoj në plazh, atëherë mund llogaritet se harxhoj maksimum 200 euro”, tha Arsimi.

Ai u bëri thirrje të rinjve që të investojnë në aplikacione dhe teknologjitë e reja.

“Investoni në përdorimin e aplikacioneve të reja, jo para, por informacione dhe dije. Sidomos tani me inteligjencën artificiale, e cila iu jep përmbajtje. Sot paguhet përmbajtja. Bëni përmbajtje, pasi ajo paguhet”, tha Arsimi.

Ai gjithashtu theksoi se vendet tona kanë nevojë për emisione të ngjashme si ato në Turqi, në stilin e “Surviver”./Telegrafi/

*Ky emision mundësohet nga Porsche, KFC, Neotel, CityFashion, Garden dhe Uniqa.