Një grua u bllokua me kokë poshtë për shtatë orë, teksa u përpoq të merrte telefonin e saj midis gurëve në Australi

Një grua që u përpoq të merrte telefonin e saj të humbur nga midis gurëve në Luginën Hunter të Australisë, u bllokua me kokë poshtë për shtatë orë para se të shpëtohej.

Sipas mediave të huaja, përcjell Telegrafi, gruaja kishte qenë duke ecur me miqtë në një pronë private në Laguna, një vend në Luginën Hunter rreth 120 kilometra nga Sydney, kur i ra telefonin.

Dhe në një farë mënyre, ndërsa u përpoq ta merrte atë, ajo rrëshqiti fillimisht me fytyrë në një të çarë tri metra midis dy gurëve të mëdhenj.

Miqtë e saj u përpoqën për një orë për ta liruar, sipas shërbimit të Ambulancës NSW, por në fund hoqën dorë dhe thirrën për ndihmë.

Policia e NSW tha se shërbimet e urgjencës u thirrën në orën 9:30 të mëngjesit të 12 tetorit në lidhje me një grua 23-vjeçare që ishte bllokuar ndërsa përpiqej të merrte një celular.

Disa gurë të rëndë u hoqën për të krijuar një pikë qasjeje të sigurt, më pas shpëtuesit ndërtuan një kornizë për të kryer atë që po bëhej një operacion shumë delikat, shtuan ata.

Dhe për fatin e saj, ajo shpëtoi vetëm me gërvishtje dhe mavijosje të vogla.

Peter Watts, specialist i ndihmës së shpejtë të ambulancës NSW, tha se ai kurrë nuk kishte parë diçka të tillë.

Gruaja, emri i së cilës nuk është bërë publik, është dërguar në spital. Por telefoni i saj, megjithatë, mbetet i bllokuar mes shkëmbinjve. /Telegrafi/