Një grua e shtrirë e vdekur në dyshemenë e qendrës së mbajtjes së migracionit në Libi – pamje që tregojnë realitetin atje

Janë shfaqur disa pamje që thuhet se tregojnë një grua të shtrirë të vdekur në dyshemenë e një qendre paraburgimi për emigracionin në Libi, në pamjet e fundit tronditëse të kushteve të refugjatëve në vendin e Afrikës Veriore.

Pamjet, që besohet se janë filmuar dy javë më parë nga një grup që mbërriti në Tunizi nga Libia, tregon një dhomë brenda qendrës së paraburgimit Abu Salim në Tripoli, shkruan The Guardian, përcjell Telegrafi.

Duke treguar dhomën ku qindra azilkërkuese femra janë grumbulluar së bashku në shtretër, një grua nigeriane dëgjohet të bërtasë dhe e quan objektin një “burg”.

Dhe videoja disa sekonda përfundon me imazhin e një gruaje të kequshqyer që duket e shtrirë e vdekur në tokë, pa rroba, me sytë hapur.

“Kjo grua ka vdekur”, thotë gruaja nigeriane. “Ajo vdiq sot në mëngjes”.

Médecins Sans Frontières (MSF) dhe një burim i OKB-së konfirmuan vërtetësinë e videos dhe thanë se ajo ishte filmuar në Abu Salim.

Ndryshe, OJQ të shumta kanë raportuar incidente të përsëritura të dhunës ndaj refugjatëve dhe emigrantëve të mbajtur në objekt.

Burimi i OKB-së tha se gruaja në video, që besohet të jetë nga Somalia, mund të ketë vdekur nga tuberkulozi.

Dhjetëra azilkërkues të ndaluar në Abu Salim janë infektuar me sëmundjen, me punonjësit e ndihmës që raportojnë se po lëngojnë në dhoma të mbushura me njerëz dhe nuk kanë qasje në kujdesin mjekësor.

Organizata Refugjatë në Libi, e cila menaxhohet nga refugjatë dhe azilkërkues, tha se po hetonte rastin.

“Ne po përpiqemi të zbulojmë se kush ishte kjo grua”, ka thënë një zëdhënës. /Telegrafi/