Nitaj i reagon ministrit të Shqipërisë: Qenke në kohen e ‘vëllezërve kinez e miqve kosovarë’

Deputeti i Aleancës për Ardhmërinë e Kosovës, Muharrem Nitaj ka reaguar ndaj deklaratave të ministrit të Financave dhe Ekonomisë në Shqipëri, Arben Ahmetaj, i cili e ka cilësuar si jo të shëndetshme rritjen e taksës prej 100% nga Kosova për produktet serbe.

Nitaj,në një shkrim në Facebook ka thënë se duhet një taksë edhe për Ministrin shqiptar Ahmetaj.

“Një taksë edhe për Ministrin shqiptar Ahmetaj, aman!. Ministri shqiptar i financave, Arben Ahmetaj, paska deklaruar se taksa e Qeverisë së Kosovës për produketet serbe, nuk qenka e shëndetshme!”, ka shkruar Nitaj.

E porosis Ministrin Ahmetaj, thotë Nitaj, të kujdeset për shëndetin e Qeverisë së tij dhe hiç mos ta ketë gajle shëndetin tonë!

“Ai në vend që ministrit serb të financave t’i kërkojë sqarime për agresionin ekonomik e politik të Serbisë ndaj Kosovës, paska premtuar lehtësira për importet nga Serbia! S’ka problem, veç dushk për gogla mos na shitni! Këtij farë ministri i paska ngelur sahati në kohën e “vëllezërve kinezë e miqve kosovarë”!”, ka përfunduar Nitaj.

Vendimi i Qeverisë së Kosovës për rritjen e taksave ndaj mallrave serbe në 100% është vlerësuar si jo e shëndetshme për ekonominë e dy vendeve, nga ana e ministrit të Financave dhe Ekonomisë së Shqipërisë, Arben Ahmetaj.