Ministri Krasniqi: Nga 1 korriku, dasmat do të organizohen në bazë të një udhëzuesi

Qeveria e Kosovës ka shfuqizuar vendimin i cili i ndalonte tubimet, aktivitetet sportive dhe punën e pishinave, për çka edhe u hap mundësia e organizimit të dasmave nga data 1 korrik e këtij viti, por duke respektuar një udhëzues që do të publikohet ditëve në vijim.

Ministri i Industrisë dhe Tregtisë, Vesel Krasniqi, në një prononcim për Telegrafin sqaroi se nesër do të dalin me një udhëzues me rekomandime për masat që duhet të merren për këto organizime.

“Nga nesër, do të bëjmë një udhëzues, edhe do të jetë publik për të gjithë. Bashkë edhe me Ministrinë e Shëndetësisë, në grupin punues në kuadër të kësaj ministrie ku edhe ne bëjmë pjesë do ta publikojmë këtë udhëzues dhe besoj se nga data 01.07.2020 do të filloj edhe organizimi i dasmave”, tha Krasniqi për Telegrafin.

Përkundër rritjeve të rasteve me COVID-19, Qeveria e Kosovës në mbledhjen e mbrëmjes ka marrë vendim që të rihap transportin ajror, pishinat dhe tubimet publike. Por ekzekutivi tha se nëse nuk mund të mbikëqyren gjatë javës në vazhdim, dhe ka situatë të re epidemiologjike në Kosovë, rekomandimi është kthimi i masave rigoroze.

Lexo po ashtu Nga 28 qershori në Kosovë lejohet qarkullimi ajror dhe puna e autoshkollave

Qeveria e Kosovës ka miratuar vendimin e propozuar nga Ministria e Shëndetësisë për të lejuar punën e transportit ajror dhe rifillimin e punës së autoshkollave, i cili u bë i mundur pas vlerësimit të gjendjes epidemiologjike të cilën e ka bërë Instituti Kombëtar i Shëndetësisë Publike të Kosovës.

Vendimi pritet të hyjë në fuqi, ditën e nënshkrimit, ndërsa bëhet e ditur që kjo do të ndodhë nën masa strikte të mbrojtjes, në mënyrë që të mos përhapet edhe më shumë sëmundja ngjitëse,  COVID-19. /Telegrafi/