Ekonomi Të Tjera

Nënshkruhet partneritet strategjik mes Rotary Distriktit 7570, SHBA dhe Distriktit 2485, Shqipëri–Kosovë

Para 1 jave

Në kuadër të Konferencës Vjetore të Rotary International Distriktit 7570, e cila po mbahet në The Inn at Virginia Tech, në qytetin universitar të Blacksburg, Virginia, u nënshkrua një marrëveshje historike për partneritet strategjik dhe binjakëzim ndërmjet Rotary Distriktit 7570 (që mbulon shtetet e Virxhinia dhe Tenesi në SHBA) dhe Rotary Distriktit 2485 (Shqipëri–Kosovë).

Sipas një njoftimi për media bëhet e ditur se kjo marrëveshje u firmos gjatë një ceremonie virtuale ndërmjet dy guvernatorëve: Butrint Batalli, Guvernator i D2485 dhe Bret W. Hrbek, Guvernator i D7570, në prani të qindra pjesëmarrësve rotarian.

“Guvernatori i D7570, Bret W. Hrbek, ndau një reflektim të veçantë mbi origjinën e këtij partneriteti: E gjitha filloi me pjesëmarrjen tonë – time dhe të mikut tim Guvernator Butrint Batalli, në Konferencën e Paqes të Rotary International. Gjatë asaj eksperience frymëzuese, biseduam për mundësitë që Rotary të na bashkojë edhe më ngushtë si distrikte, për të promovuar vlerat e përbashkëta që ndajmë: paqe, mirëkuptim, lidership dhe veprim konkret në shërbim të njerëzimit”.

Në fjalimin e tij, Guvernatori Butrint Batalli shprehu falënderim të thellë ndaj kombit amerikan dhe Distriktit 7570.

“Ne jemi thellësisht mirënjohës për mbështetjen e kombit tuaj për më shumë se një shekull, dhe sidomos për rolin e pa kompromis në ndalimin e gjenocidit në Kosovë. Kjo marrëveshje nuk mund të kishte një përmbyllje më domethënëse se kjo – nënshkrimi i një partneriteti që mishëron miqësinë e sinqertë dhe bashkëpunimin strategjik dhe të natyrshëm mes kombeve tona”.

Guvernatori Batalli më tej shtoi: “Kjo nuk është vetëm një marrëveshje – është një urë që lidh të kaluarën me të ardhmen, mirënjohjen me misionin, simbolikën me angazhimin konkret. Është një thirrje për të vepruar së bashku në mbarë botën, për të sjellë ndryshim të qëndrueshëm në komunitetet tona, përtej kufijve dhe brenda vetes sonë.”

Tutje thuhet se ky partneritet i ri synon të fuqizojë lidhjet ndërkombëtare dhe të promovojë misionin global të Rotary-t për paqe, shërbim dhe ndërtim të komuniteteve. Objektivat kryesore të kësaj marrëveshjeje përfshijnë:

Zhvillimin e projekteve të përbashkëta humanitare dhe zhvillimore, në fushën e arsimit, shëndetësisë, sipërmarrjes dhe zhvillimit ekonomik lokal dhe të komuniteteve në të dyja anët e Atlantikut;

Shkëmbime ndërkulturore dhe profesionale, përmes vizitave të ndërsjella, Rotarakt, Interakt dhe programeve të liderishipit dhe zhvillimit profesional;

Rritjen e kapaciteteve të klubeve, përmes mentorimit, bashkëpunimit dhe ndarjes së përvojave të suksesshme;

Promovimin e paqes, mirëkuptimit ndërkombëtar dhe miqësisë ndërmjet popujve, duke reflektuar vlerat e përbashkëta të Rotary International. /Telegrafi/