Botë Nga Bota

Gjykata Ndërkombëtare e Drejtësisë ka nisur dëgjimin e saj nga Afrika e Jugut që akuzon Izraelin për gjenocid në Gaza

Para 10 muajve

(E plotësuar) Gjykata Ndërkombëtare e Drejtësisë ka nisur dëgjimin e saj në procedurat e ngritura nga Afrika e Jugut duke akuzuar Izraelin për gjenocid kundër palestinezëve në Gaza.

Dhe sipas mediave të huaja, përcjell Telegrafi, tanimë gjyqtarët që përfaqësojnë Izraelin dhe Afrikën e Jugut janë betuar.

Aharon Bharak, një 87-vjeçar i mbijetuar i Holokaustit dhe gjyqtar i Gjykatës së Lartë në pension, po përfaqëson Izraelin.

Ndërsa Dikgang Moseneke, një ish-zëvendës kryetar i drejtësisë, po përfaqëson Afrikën e Jugut. /Telegrafi/

Izraeli do të paraqitet para Gjykatës Ndërkombëtare të Drejtësisë – që mund të përcaktojë rrjedhën e luftës në Gaza

Një betejë ligjore nëse lufta e Izraelit kundër Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – në Gazë përbën gjenocid, hapet të enjten në gjykatën më të lartë të Kombeve të Bashkuara me seancat dëgjimore pasi Afrika e Jugut u bëri thirrje gjyqtarëve që të urdhërojnë pezullimin e menjëhershëm të veprimeve ushtarake të Izraelit.

Ndërsa Izraeli i mohon plotësisht akuzat për gjenocid.

Afrika e Jugut e dërgoi Izraelin në Gjykatën Ndërkombëtare të Drejtësisë për “gjenocid” gjatë luftës së tij në enklavën palestineze.

Gjykata ka vendosur ta shqyrtojë kërkesën e Afrikës së Jugut në seanca dëgjimore më 11 dhe 12 janar.

Rasti mund të zgjasë disa vjet.

Izraeli i konsideron të padrejta dhe të njëanshme gjykatat e OKB-së dhe ato ndërkombëtare.

Por ai po dërgon një ekip të fortë ligjor në Gjykatën Ndërkombëtare të Drejtësisë për të mbrojtur operacionin e tij ushtarak të nisur pas sulmeve të 7 tetorit nga Hamasi.

“Unë mendoj se ata kanë ardhur sepse duan të shfajësohen dhe mendojnë se mund t’i rezistojnë me sukses akuzës për gjenocid”, tha Juliette McIntyre, një eksperte për të drejtën ndërkombëtare në Universitetin e Australisë Jugore.

Seancat dëgjimore paraprake në Gjykatën Ndërkombëtare të Drejtësisë fillojnë me avokatët për Afrikën e Jugut duke u shpjeguar gjyqtarëve pse vendi ka akuzuar Izraelin për “veprime dhe mosveprime” që janë “në karakter gjenocidal” në luftën në Gazë.

Seanca hapëse e së enjtes përqendrohet në kërkesën e Afrikës së Jugut që gjykata të vendosë urdhra të përkohshëm detyrues, duke përfshirë ndalimin e fushatës ushtarake të Izraelit. Një vendim mund të marrë disa javë.

Ofensiva e Izraelit ka vrarë më shumë se 23.200 palestinezë në Gaza, sipas Ministrisë palestineze të Shëndetësisë në territorin e kontrolluar nga Hamasi.

Rreth dy të tretat e të vdekurve janë gra dhe fëmijë, thonë zyrtarët shëndetësorë.

Në sulmin e 7 tetorit militantët palestinezë vranë rreth 1.200 njerëz, kryesisht civilë. Ata rrëmbyen rreth 250 të tjerë, gati gjysma e të cilëve janë liruar. /rel/