Princi William dhe Harry kanë lënë mënjanë mosmarrëveshjet pasi të enjten u shfaqën së bashku për të zbuluar një statujë që nderon nënën e tyre, Diana, Princeshën e Uellsit në Pallatin Kensington.
Statuja - e cila u porosit fillimisht në 2017 në 20 vjetorin e vdekjes së saj - u zbulua në një ceremoni në atë që do të kishte qenë ditëlindja e 60-të e Dianas.
Djemtë e saj në ngjarjen e së enjtes u shfaqën duke biseduar me njëri-tjetrin gjatë hyrjes në kopsht, përpara se të përshëndetëshin me të afërmit përfshirë edhe vëllezërit e motrat e nënës së tyre, Lady Sarah McCorquodale, Lady Jane Fellowes dhe Earl Spencer.
Princesha Diana, Princi William dhe Harry (Foto: Getty Images)
Gjithashtu i pranishëm ishte skulptori i statujës, Ian Rank-Broadley, projektuesi i kopshtit Pip Morrison si dhe anëtarët e komitetit të statujës.
Ndërkohë, as Duka i Kembrixhit dhe as Duka i Sussexit nuk mbajtën ndonjë fjalim gjatë ceremonisë.
William dhe Harry e nderuan të ëmën në një deklaratë të përbashkët të publikuar përmes Pallatit Kensington pas ngjarjes së rëndësishme, duke thënë: “Sot, në atë që do të kishte qenë ditëlindja e 60-të e nënës sonë, ne kujtojmë dashurinë, forcën dhe karakterin e saj”.
"Çdo ditë, urojmë që ajo të ishte akoma me ne dhe shpresa jonë është që kjo statujë të shihet përgjithmonë si një simbol i jetës dhe trashëgimisë së saj”, vazhduan ata përpara se të falënderonin ekipin dhe donatorët e përfshirë në projektin e shumëpritur.
Zbulohet statuja e Princeshës Diana (Foto: Dominic Lipinski/Pool/AP)
Kjo po ashtu ishte hera e parë e ribashkimit të Harryt dhe William që pas varrimit të Dukës së Edinburgut.
William dhe Harry jetuan në Pallatin Kensington me nënën e tyre para se ajo të vdiste në një aksident me makinë në 1997.
Princi William dhe Harry (Foto: Yui Muk/AP)
Derisa është komentuar tejet shumë raporti i tyre, vëllëzërit dukeshin të qetë duke përshëndetur ngrohtësisht të ftuarit dhe duke bërë shaka me grupin e vogël të të pranishmëve. /Telegrafi/
