Kompania e hulumtimve Pyper në bashkëpunim me Odën e Afarizmit të Kosovës, dua.com, American Chamber of Commerce in Kosovo, Riinvest Institute, Odën Ekonomike të Kosovës ka realizuar një hulumtim në lidhje me ndikimin e virusit COVID-19 në bizneset në Kosovë.
Në hulumtim kanë marrë pjesë 560 biznese të cilat operojnë në Kosovë, transmeton Telegrafi.
Në hulumtim thuhet se bizneset janë shumë të shqetësuara me gjendjen ekonomike si pasojë e situatës me COVID-19.
Bizneset janë deklaruar se biznesi tyre është afektuar si pasojë e masave për parandalimin e coronavirusit.
Këto biznese që janë afektuar, kanë hasur në humbje të të hyrave si pasojë e uljes së shitjeve.
Sipas hulumtimit, 25.36 % e bizneseve (142) nga gjithsej 560 do të jenë në gjendje të mbijetojnë vetëm 1 muaj pa ndihma të jashtme, shkruan Telegrafi.
Ndërsa, 158 biznese nga 560 do të jenë në gjendje të mbijetojnë vetëm dy muaj pa ndihma të jashtme.
Tutje në hulumtim thuhet se këto biznese konsiderojnë që masat që duhet të ndërmerren për mbështetjen e bizneseve si rezultat i COVID-19, janë të dobishme.
Bizneset kanë vlerësuar se kompensimi i pagave nga Qeveria është ndër masat më të dobishme për tejkalimin e situatës, përcjell Telegrafi.
Gjithashtu, 95.54 % qind e këtyre bizneseve mendojnë se Qeveria duhet të ndërmarrë masa shtesë për mbështetjen e bizneseve gjatë periudhës së coronavirusit.
Kurse, 380 biznese nga 560 që janë përfshirë në hulumtim, mendojnë se Qeveria duhet të ndërmarrë masa për kompensim të plotë të shpenzimeve.
Më tej, në hulumtim thuhet se 201 biznese nga 560, mendojnë të tejkalojnë gjendjen aktuale përmes financimit nga institucionet bankare.
Kurse, 158 biznese planifikojnë të zvogëlojnë fuqinë punëtorë për të tejkaluar gjendjen aktuale, përcjell Telegrafi.
Tutje në hulumtim thuhet se 206 biznese kanë deklaruar se ka shumë gjasa që biznese i tyre të falimentojë, përcjell Telegrafi.
Ndërsa, 327 biznese kanë deklaruar se kanë hasur në probleme por që ka pak gjasa të falimentojnë./Telegrafi/
