Kuvendi pa kuorum për të votuar tërheqjen e parave nga Trusti, seanca vazhdon nesër

Kuvendi ka ndërprerë sot punimet e saj në mungesë të kuorumit, për të vazhduar nesër në orën 10:00.

Kryetari i Kuvendit të Kosovës Glauk Konjufca, i paralajmëroi deputetët opozitar që të marrin pjesë në votimin e pikave të rendit të ditës, ose do ta mbyll seancën.

Reagimi i tij u bë, pasi shumica dërrmuese e deputetëve të opozitës nuk morën pjesë në proceset e votimeve të amendamenteve të shqyrtimeve të Projektligjeve.

Mirëpo, menjëherë reaguan deputetët nga opozita dhe i kërkuan që mos ta bëjë një gjë të tillë, pasi në rend të ditës është edhe tërheqja e kursimeve pensionale nga Trusti.

Por pavarësisht kësaj, kryeparlamentari u shpreh i vendosur në ndërprerjen e seancës.

“S’ka trustë çfarë trusti, nëse vazhdon kështu po e ndërprej seancën. Veç edhe këtë projektligj po e votojmë këtë projektligj  e shkojmë nga shtëpia e  ecim. Nuk ka kuorum kuvendi për të vazhduar shihemi nesër në orën 10:00”, ka thënë Konjufca.

Deputetët e Kuvendit të Kosovës miratuan në lexim të dytë vetëm Projektligjin për akcizën në produktet e duhanit.

Ndërsa dështuan të miratoheshin Projektligji për Këshillin Prokurorial, Projektligji për markat tregtare dhe Projektligji për mbrojtjen e ajrit nga ndotja.

Pikat e mbetura nga seanca – rendi i ditës

Shqyrtimi i parë i Projektligjit nr.08/L-134 për plotësimin dhe ndryshimin e Ligjit nr. 04/L-101 për fondet pensionale të Kosovës, i plotësuar dhe ndryshuar me Ligjin nr. 04/L-115, me Ligjin 04/L-168 dhe Ligjin nr. 05/L-116,

Shqyrtimi i parë i Projektligjit nr. 08/L-137 për Pyjet,

Shqyrtimi i parë i Projektligjit nr.08/L-146 për Zbatimin e Sanksioneve Financiare Ndërkombëtare të Shënjestruara,

Shqyrtimi i parë i Projektligjit nr.08/L-145 për parandalimin dhe kontrollin e integruar të ndotjes,

Shqyrtimi i kërkesës së Komisionit Hetimor Parlamentar lidhur me procesin e vendimmarrjes në sektorin e energjisë për periudhën 2006-2022, në nivelin legjislativ, ekzekutiv, rregullator dhe në ndërmarrje publike për zgjatjen e mandatit,

Miratimi i buxhetit të Komisionit Hetimor Parlamentar lidhur me procesin e vendimmarrjes në sektorin e energjisë për periudhën 2006-2022, në nivelin legjislativ, ekzekutiv, rregullator dhe në ndërmarrje publike,

Miratimi i buxhetit të Komisionit Hetimor Parlamentar lidhur me menaxhimin e krizës energjetike nga Qeveria e Republikës së Kosovës,

Propozimi i grupeve parlamentare për zëvendësimin e anëtarëve në Komisionet Hetimore Parlamentare,

Emërimi i kryetarit dhe katëranëtarëve të Bordit në Organin Shqyrtues të Prokurimit,

Përzgjedhja e kandidatit për një (1) anëtar jo-ekzekutiv të Bordit të Bankës Qendrore të Republikës së Kosovës,

Formimi i Komisionit Ad-hoc për Reformën Zgjedhore në Kosovë,

Shqyrtimi i Raportit vjetor të Performancës së Zyrës Kombëtare të Auditimit për vitin 2021,

Shqyrtimi i Raportit vjetor financiar i Zyrës Kombëtare të Auditimit për vitin 2021. /Telegrafi/