Mulliri i vetëm me ujë në Mitrovicë

Prej më tepër se 20 mullinjve me ujë që dikur punonin në rajonin e Mitrovicës, tashmë ka mbetur vetëm një, i cili përveç kërkesës së njerëzve për miell të misrit, ka mbetur edhe si një relikt i një kohe të vjetër që zgjon kërshërinë e vizitorëve.

Vetëm një kilometër në dalje të qytetit të Mitrovicës në drejtim të Shalës së Bajgores, gjendet mulliri i vetëm me ujë që punon në këtë rajon. Shumica e qytetarëve të Mitrovicës e dinë këtë vend, meqë shpesh drejtohen aty për të blerë miell misri, por në atë mulli drejtohen edhe klientë nga qytete tjera të Kosovës, duke pasur parasysh cilësinë e miellit që nxjerr ai.
Për mullirin përkujdeset plaku që ka më shumë se 90 vjet, Osman Osmani, i cili ndihmohet edhe nga anëtarët tjerë të familjes. Ai thotë se mulliri në atë vend ka ekzistuar që qindra vjet. ”Na jemi këtu i ka mbi 200 vjet. Gjithë kemi pas mulli, nuk e mbaj mend mirë, i kam më shumë se 90 vjet. Edhe përpara baba e ka pas, babgjyshi, katragjyshi”, thotë për Kosovapress Osmani.

Ai, i cili përkundër moshës mbahet shumë mirë, thotë se përpara në rajonin e tyre kanë funksionuar 20 mulli me ujë, ndërsa tani ka mbetur vetëm i tyre.

Sipas tij, megjithë ndryshimin e mënyrës së jetesës, ende ka interesim për të bluar në atë mulli. ”Janë ardhë këtu me blu kahmos, prej Drenice, prej Mazgiti, Kolle, Shalci, Dërvari, Mihaliq, Haxhë, Galicë, e Mikushnicë. Vijnë me pa mullirin edhe me marr miell. Ka qe vijnë edhe nga Prizreni, kanë lidhje pas lidhje, kanë miqësi”, sqaroi Osmani.

Ai rrëfen edhe për vështirësitë dhe pluhurin që tani po i shkakton probleme në këtë punë, duke bërë të ditur se ndihmohet shpesh nga Sefa, Adnani dhe të rinjtë tjerë të familjes së tij. Traditën familjare janë duke e vazhduar edhe pasardhësit në këtë familje.

Sefedini, djali i Osmanit, i cili punon në KEDS, thotë se sa herë ka kohë i ndihmon babait dhe me kënaqësi merret me punët e mullirit. ”Mbase punoj në KEDS, megjithatë po më del kohë edhe për këtë punë dhe e bëj me kënaqësi. Nuk ka punë ku me ditë sa, por bëhemi idare”, ka thënë Sefedini.

Familja Osmani përkundër faktit se tash nuk ka shumë fitim, janë të vendosur që ta vazhdojnë punën në mullirin e tyre me ujë. /Telegrafi/