Mulhaxha-Kollçaku: Vetëvendosje nuk ka thirrur protestë për nesër

Nënkryetarja e Lëvizjes Vetëvendosje, Fatmire Mulhaxha-Kollçaku tha sot se dhuna e presidentit të vendit, Hashim Thaçi e cenoi demokracinë në vend.

Ajo tha se privimi i fjalës së lirë është shqetësuese dhe sipas saj, dje edhe një gazetari është tentuar t’i merren mjetet me të cilat xhironte ngjarjen.

“Privimi i fjalës së lirë është shqetësuese… nga një njeri që ka marrë rolin e diktatorit i cili na thotë se do ta godas çdokënd që nuk mendon si unë. Ndodhi edhe diçka tjetër, u privua edhe ushtrimi i detyrës së një përfaqësuesi, gazetari i cili tentoi të filmonte këtë ngjarje. Tentuan ta konfiskojnë mjetet të cilat regjistronte këtë ngjarje. Kur privohet fjala e lirë atëherë nuk ka demokraci”, tha ajo.

Ajo ftoi organet e hetuesisë që ta zbardhin rastin e aktivistit Veron Hasani.

Në lidhje me protestën që është paralajmëruar nesër, Kollçaku tha se nuk është e ftuar nga partia e saj, por kjo nuk do të thotë që në të ardhmen nuk do të thërrasin një të tillë. Sipas saj, presidenti Thaçi nuk do të mund t‘i ndalojë qytetarët që të shfaqin pakënaqësinë.

Ajo tha se të gjithë do të jenë të informuar kur LVV do të thërras protestë. /Telegrafi/