Mrika dhe Arianit Nikçi përfundojnë me sukses ekspeditën ‘Everest 2019’, bëjnë ngjitjen historike në majën më të lartë në botë

Dy alpinistët shqiptarë nga Kosova, Mrikë dhe Arianit Nikçi, e kanë përfunduar në mënyrë të jashtëzakonshme dhe me shumë sukses ekspeditën ‘Everest 2019’ duke u ngjitur në majën më të lartë në botë.

“Mrikë Nikçi, si 17 vjeçare, njëherit alpinistja më e re nga të gjithë pjesëmarrësit botërorë në Ekspeditën ‘Everest 2019’ dhe si shqiptarja më e re, së bashku me babanë Arianit Nikçi, sot me datën 27 maj në ora 6:10 (ora lokale e Nepalit) të mëngjesit realizuan me sukses ngjitjen në majën më të lartë në botë Mt. Everest 8848 led”, thuhet në njoftimin e shoqatës ‘SHBA Gjeravica’ në Facebook.

Nga ana tjetër, në njoftimin e faqes ‘Climbing The Seven Summits‘ thuhej se Niti, Mrika, Prakash dhe Lhakpa, kishin arritur në majën më të lartë në botë.

Lexo po ashtu Të gjitha lajmet nga Mrika Nikqi

Ata kanë njoftuar se moti ishte i mrekullueshëm dhe se e kanë pushtuar Everestin, ndërkohë që të tjerët po vazhdonin ngjitjen pas tyre.

Për më shumë, Mrika është bërë femra më e re në botë që është përfshirë në sfidën e njohur si ‘Seven Summits’ që iu referohet ngjitjes në shtatë majat më të larta në botë.

Kujtojmë që në vitin e kaluar, Arianiti dhe Mrika ishin ngujuar në Antarktik. Pas pushtimit me sukses të majës më të lartë të kontinentit të akullt, Mount Vinson 4892 lmb, kishin arritur në kampin kryesor. Edhe pse në kampin bazë do të duhej të qëndronin një apo dy ditë, moti nuk ishte në favor të tyre që të merrnin dritën e gjelbër për të fluturuar drejt Union Glacierit, ashtu që kishin qëndruar për disa ditë të bllokuar. /Telegrafi/