Momenti kur Eros Grezda godet me grusht sulmuesin kundërshtar Çolak pas ndeshjes Rijeka – Osijek

Sulmuesi i Kombëtares Shqiptare dhe Osijekut, Eros Grezda, është përfshirë në një sherr me grushte me sulmuesin e Rijekës, kroatin Antonio Mirko Çolak.

Shqiptari e ka goditur sulmuesin kroat në parkingun e stadiumit, ku qëndronin autobusët e të dyja skuadrave, pas ndeshjes Osijek – Rijeka.

Ky lajm ka bërë një bujë të madhe në mediat kroate, të cilat kanë publikuar së fundmi edhe videon e momentit kur të dy lojtarët janë kacafytur.

Pamjet janë marrë nga kamerat e sigurisë të parkingut ku ndodhi përplasja.

Futbollisti ynë ka reaguar përmes faqes së klubit, ku ka thënë se është provokuar gjatë dhe pas ndeshjes nga Çolak.

“Më vjen shumë keq që u gjenda në qendër të vëmendjes së mediave, sidomos për kontekstin e çdo gjëje që ka ndodhur përpara dhe gjatë ndeshjes me Rijekan”.

“Të gjithë ne ishim të zhgënjyer nga fakti se si sportistë u dëmtuam gjatë takimit dhe na u mohua fitorja, të cilës i ishim pranë. Nuk është e lehtë për ne të durojmë padrejtësinë në fushë dhe të qëndrojmë të qetë, sidomos kur dikush na fyen”.

U cijelosti prenosimo viđenje Erosa oko situacije na parkingu stadiona Rujevica.https://t.co/xUvTMb1eEB

— NK Osijek (@nkosijek) June 1, 2020

“Kur vjen puna te fyerjet e rënda në aspekt personal dhe kombëtar, qoftë si njeri, qoftë si sportist jam shumë i ndjeshëm. E gjitha kjo ndodhi jo vetëm gjatë ndeshjes, por dhe pas saj”.

“Unë po qëndroja përpara autobusit të skuadrës sime dhe sulmuesi rival Colak po kalonte para meje në mënyrë provokuese. Jam përballur me provokimet e tij gjatë gjithë ndeshjes. Jetoj për shumë vite në Kroaci. I përmbush detyrimet e mia si qytetar dhe i paguaj taksat dhe nuk e meritoj që dikush të më fyejë për ndjenja kombëtare. Do të marr të gjitha hapat ligjor për të mbrojtur veten dhe nderin tim”, ka thënë Grezda. /Telegrafi/