Ministria e Shëndetësisë ka përfunduar dezinfektimin në fshatin Simnicë të Gostivarit

Komisioni për sëmundje ngjitëse pranë Ministrisë së Shëndetësisë më 26 korrik ka mbajtur seancë urgjente për shkak të vdekjes së dy qytetarëve nga viruset e etheve hemorragjike.

Nga Ministria e Shëndetësisë informojnë se një ekip ekspertësh kanë kryer hetime epidemiologjike në fshatin Simnicë, anketë me familjarët e të vdekurve dhe më pas kanë bërë dezinfektimin e shtëpisë dhe rrethinës në vendin e ngjarjes, përcjell Telegrafi Maqedoni.

Nga anketa me familjarët Ministria e Shëndetësisë ka marrë informacione se të vdekurit dhe një pjesë e familjes shpesh kanë punuar në arën e tyre private.

“Në arën e familjarëve nuk janë gjetur as persona as kafshë. Është bërë dezinfektim i objekteve të mbyllura, të hapura dhe në magazinën e shtëpisë. Gjithashtu dezinfektim është bërë edhe në hapësirë më të madhe rreth shtëpisë”, thuhet në njoftimin e Ministrisë së Shëndetësisë.

Nga kjo mininistri gjithashtu njoftojnë se Instituti për Shëndet Publik ka përgatitur broshura për punëtorët shëndetësor, por edhe për qytetarët e rëndomtë, me qëllim që të edukohen në lidhje me viruset e etheve hemorragjike./Telegrafi/