Ministria e Punës dhe UNDP mbështesin të riatdhesuarit në kuadër të Programit të Vetëpunësimit

Ministri i Punës dhe Mirëqenies Sociale, Skënder Reçica së bashku me përfaqësuesen e përhershme të UNDP-së në Kosovë, Maria Suokko kanë takuar disa nga punëkërkuesit, të cilëve edhe u janë ndarë pajisjet e nevojshme për të filluar punën në bizneset e tyre, si përfitues të Programit të Vetëpunësimit për të riatdhesuarit që është shpallur këtë vit.

Lidhur me këtë, Reçica, ka thënë se, pavarësisht vështirësive të krijuara nga pandemia COVID-19 është arritur të mbështeten qindra qytetarë për t’u bërë pjesë e tregut të punës me anë të bizneseve të tyre.

“Ne si Ministri e Punës dhe Mirëqenies Sociale (MPMS), në bashkëpunim me partnerin tonë, Programin për Zhvillim të Kombeve të Bashkuara (UNDP) në Kosovë, këtë vit nëpërmjet Fazës së parë të Programit të Vetëpunësimit kemi përkrahur 136 punëkërkues në hapjen e bizneseve të tyre ndërkaq pak ditë më parë shpallëm edhe fazën e dytë të Programit të vetëpunësimit ku do të mbështeten edhe shumë punëkërkues të tjerë të riatdhesuar në Kosovë”, ka thënë Reçica.

Gjithashtu, ai ka ashtuar se, krahas Programit të Vetëpunësimit, po mbështetet punësimi afatgjatë i punëkërkuesit edhe nëpërmjet Programit të Subvencionimit të Pagës, në bashkëpunim edhe me bizneset, si përpjekje për të ndihmuar si punëkërkuesit po ashtu edhe bizneset në vend. /Telegrafi/