Mësuesit në klasë, me Skype

Gjatë ditës së sotme, Skype ka prezantuar një shërbim të ri shoqërimi të cilin e ka dedikuar për të gjithë mësuesit e botës, ndërsa të njëjtin e ka emërtuar “Skype in the Classroom”, që në shqip përkthehet - Skype në Klasë

Shërbimi i ri i Skype është krijuar që t’i ndihmojë mësuesve në secilin vend të botës që të përdorin atë për qëllime studimi, ndërsa thuhet se ky shërbim do t’i ndihmojë edhe nxënësve që të mësojnë.

Përkatësisht, ‘Skype in the Classroom’ është një vend ku mësuesit apo profesorët nga e gjithë bota lidhen me njëri-tjetrin, gjejnë interesime të ngjashme për mësimdhënie dhe shkëmbejnë informata apo interesa të përbashkëta.

Të gjithë mësuesit të cilët dëshirojnë të përfitojnë nga shërbimi i ri i Skype, duhet që të krijojnë një llogari të përdoruesit nën kategorinë Mësuesi, dhe më pas të përfshijnë interesat, specializimet dhe lokacionin prej nga ata vijnë.

Skype in the Classroom fillimisht është në versionin Beta, mirëpo i njëjti do të finalizohet me kohë, kur edhe të ketë një numër të madh mësuesish të cilët e përdorin këtë shërbim. / Telegrafi /