Merr vesh se Donald Trump rezultoi pozitiv me COVID-19, përkrahësi i flaktë i presidentit amerikan vdes nga sulmi në zemër

Një përkrahës i flaktë i presidentit amerikan Donald Trump, ishte shqetësuar aq shumë kur e kuptoi se Trump ka rezultuar pozitiv me COVID-19, sa që ka pësuar sulm në zemër ku si rezultat i kësaj ka humbur jetën, shkruan Reuters.

Bussa Krishma nga India i cili kishte pranuar se përkrahja e madhe për Trumpin i kishte lindur katër vite më parë kur edhe iu shfaq në ëndërr,  kishte postuar disa ditë para vdekjes një video në Facebook, duke i uruar shërim të shpejtë idolit të tij që u prek me coronavirus, nga i cili deri më tani kanë humbur jetën mbi një milion njerëz në mbarë botën, transmeton Telegrafi.

Më 2 tetor Trump kishte pranuar se ka rezultuar pozitiv me COVID-19, dhe i kishte kaluar tri ditë në një spital ushtarak. E të shtunën njoftoi se është shëruar plotësisht, duke paralajmëruar se të hënën do të marrë pjesë në tubimin e parë zgjedhor pas shërbimit nga COVID-19.

Venkat Goud, kryeplaku i fshatit Konney ku jetonte Krishna i cili njëherit ishte mik i afërt me të ndjerin, tha se Krishna kishte rënë në “depresion” kur e kuptoi se Trump dhe gruaja e tij Melania janë prekur me coronavirus.

“Është e tmerrshme sesi ndërroi jetë pa e takuar heroin e tij. Është munduar shumë që ta takojë”, ka deklaruar Goud për Reuters. /Telegrafi/