Mercedes pranon: Mund të kemi humbur një pjesë të klientëve të AMG C63

Mercedes-Benz vendosi në vitin 2022 të heqë dorë nga motori i fuqishëm twin-turbo V8 në modelin AMG C63 dhe ta zëvendësojë atë me një sistem hibrid të bazuar në një motor me katër cilindra.

Siç pritej, sistemi kompleks ofron performanca të shkëlqyera, por blerësve të mundshëm u mungon drama auditive e motorit V8.

Shefi i AMG-së, Michael Schiebe, tha për Car Magazine se “sigurisht, nuk ka dyshim se kemi humbur disa klientë që e donin motorin V8. Duhet vërtet të drejtoni këtë makinë. Është një produkt shumë bindës”.

“Me këtë teknologji kemi bërë përparime të mëdha, por na duhej të shpjegonim më shumë teknologjinë për shitësit dhe klientët tanë. Do të vazhdojmë ta bëjmë këtë dhe do të përmirësohemi më tej. Ekziston një shprehje gjermane: asnjëherë nuk keni një mundësi të dytë për një përshtypje të parë. Ndoshta na iku përshtypja e parë, por nëse ju jepet një mundësi, jam i sigurt që do të bindeni për përparësitë e kësaj teknologjie”, pohoi ai.

AMG C63 do të mbetet me sistemin hibrid, por modeli i ri AMG CLE63 do të ketë një motor V8, megjithëse fillimisht ishte parashikuar që edhe ai të kishte një sistem hibrid. /Telegrafi/