Menaxherët e kontratës 12 milionëshe të Arkitektit të Kryeqytetit japin dorëheqje – flasin nga Komuna e Prishtinës

Menaxherët e kontratës “Shërbimi i Arkitektit të Kryeqytetit” në vlerë prej 12 milionë euro, kanë dhënë dorëheqje nga pozitat e tyre.

Kështu ka bërë të ditur shefi i asamblistëve të LVV-së, Gëzim Sveçla në një postim në Facebook.

“Të gjithë menaxherët e kontratës “Shërbimi i Arkitektit të Kryeqytetit”, – kontrata 12 milionëshe e vizatimeve të bukura – kanë dhënë dorëheqje nga pozitat e tyre. Arsyet i dinë ata, i dinë edhe Përparim Rama, e do të duhej t’i dinte edhe Prokuroria e Shtetit”, ka shkruar Sveçla.

Në njoftimin për dorëheqje të ekipit menaxhues thuhet se ky largim është i parevokueshme.

“Ju njoftojmë se me datë 04.06.2024, si ekip menaxhues i SHAK, kemi dhënë dorëheqje të parevokueshme nga menaxhimi i kësaj kontrate. Andaj për çdo informatë ju rekomandojmë t’i drejtoheni zyrës se prokurimit për caktim të ekipit tjetër për menaxhim të kontratës apo çfarëdo informate tjetër rreth operatorit ekonomik“, thuhet aty.

Lidhur me këtë rast nga Komuna e Prishtinës në një përgjigje për Telegrafin kanë thënë se arsyet e dorëheqjes së tyre janë për shkak të mbingarkesës në punë.

“Menaxheri dhe mbikëqyrësit e kontratës së Shërbimit të Arkitektit të Kryeqytetit kanë kërkuar të lirohen nga kjo përgjegjësi shtesë që kanë pasur për shkak të mbingarkesës në punë. Dy prej tyre janë shefa të sektorëve me shumë përgjegjësi dhe detyra në sektorët ligjor dhe të planifikimit, pozita këto me ngarkesë të madhe.

Për më tepër, Shërbimi i Arkitektit të Kryeqytetit ka të angazhuar dhjetëra arkitektë e staf dhe është duke punuar paralelisht në rreth 35 projekte që e ka bërë të pamundur për tre zyrtarët në fjalë të mbikëqyrin punën e këtij Shërbimi”, thuhet në përgjigjen e Komunës së Prishtinës.

Më tej nga Komuna kanë thënë se janë në proces të emërimeve të reja dhe të zgjerimit të ekipit menxhues dhe mbikëqyrës.

“Prandaj, ne jemi në proces të emërimeve të reja dhe të zgjerimit të ekipit menaxhues dhe mbikëqyrës të Shërbimit të Arkitektit nga tre në pesë zyrtarë. Posa të përfundojë procesi dhe të finalizohen emërimet do të ju informojmë për ekipin e ri menaxhues dhe mbikëqyrës të këtij Shërbimi”, kanë thënë nga Komuna. /Telegrafi/