Mbreti Charles nxiti duartrokitje dhe të qeshura disa herë teksa iu drejtua Bundestagut edhe në gjermanisht, në fjalimin historik në Berlin

Mbreti Charles përshëndeti ‘lidhjen speciale’ midis Mbretërisë së Bashkuar dhe Gjermanisë pasi ai u bë monarku i parë britanik që iu drejtua Bundestagut gjatë vizitës së tij historike shtetërore në këtë vend.

Duke folur në gjermanisht dhe në anglisht – ku edhe u duartrokit disa herë – ai tha se “mezi mund të fillonte të shprehte krenarinë” që ndjente në marrëdhënie dhe foli me dashuri për lidhjet e tij “të dashura” familjare me Gjermaninë, shkruajnë mediat britanike, përcjell Telegrafi.

Charles tha: “Sot, më jep krenari të veçantë të jem me ju … dhe të rinovoj lidhjen e veçantë midis dy vendeve tona.

Kjo miqësi do të thoshte kaq shumë për nënën time të dashur, Mbretëreshën e ndjerë, e cila shpesh fliste për 15 vizitat zyrtare që ajo bëri në Gjermani, duke përfshirë pesë vizitat e saj shtetërore.

“E para prej tyre, në vitin 1965, erdhi kur kontinenti ynë ishte ende thellësisht i plagosur nga lufta dhe trauma e konfliktit. Ajo ishte brezi i kohës së luftës dhe si babai im, Mbretëresha kishte shërbyer me uniformë”.

“Nëna ime e kuptoi arritjen e jashtëzakonshme që përfaqësonte pajtimi, dhe duke ardhur në Gjermani herë pas here, ajo ishte e vendosur të luante rolin e saj. Është, ndoshta, për këtë arsye që Madhëria e saj e ndjerë fitoi një vend të veçantë në dashurinë e popullit gjerman”.

Ai gjithashtu nxiti të qeshura duke bërë shaka me rivalitetin midis dy kombeve në fushën e futbollit, duke përfshirë fitoren e anglezeve ndaj Gjermanisë në Kampionatin Evropian për femra të vitit të kaluar.

Ai vazhdoi të lavdërojë Gjermaninë për mbështetjen e Ukrainës, duke thënë se pushtimi i Rusisë ‘kërcënon’ sigurinë në të gjithë Evropën.

Ai vazhdoi: “Jemi thellësisht të tronditur nga shkatërrimi, por ne mund të inkurajohemi nga uniteti ynë kur bëhet fjalë për mbrojtjen e Ukrainës, paqes dhe lirisë”.

“Vendimi i Gjermanisë për të ofruar një mbështetje të tillë ushtarake për Ukrainën konsiderohet të jetë shumë i mirëpritur dhe shumë i rëndësishëm nga bota në përgjithësi”.

Mbreti preku gjithashtu çështjen e ndryshimeve klimatike.

Në përfundim të fjalimit, ai tha: “Në historinë e gjatë dhe të jashtëzakonshme të dy vendeve tona, ka shumë kapituj ende të pashkruar”.

“Le t’i plotësojmë këto me kërkimin për një të nesërme më të mirë. Trashëgimia e së kaluarës sonë dhe premtimi i madh i së ardhmes sonë, nuk kërkojnë asgjë më pak”. /Telegrafi/