“Do mbetet jashtë për disa muaj”, Arteta konfirmon lëndimin e yllit të skuadrës

Mikel Arteta ka deklaruar se Ben White do të mbetet jashtë fushave për disa muaj pas një operacioni të vogël në gju në atë që vjen si një goditje e rëndë për Arsenalin.

Një periudhë prej gjashtë deri në tetë javë ishte sugjeruar paraprakisht si koha që i duhet anglezit për t’u rikuperuar, por Arteta është treguar i sinqertë në vlerësimin e tij para ndeshjes me Nottingham Forest.

“Ben do të jetë jashtë për disa muaj fatkeqësisht. Ka pasur disa vështirësi të ndryshme, nuk ka qenë kurrë problemi i njëjtë”.

“Ne duhej të merrnim një vendim, nuk është përmirësuar gjatë javëve të fundit fatkeqësisht”.

“Ne e dimë se Ben do të shtyjë çdo kufi, por erdhi në një pikë kur ne duhet ta mbronim lojtarin dhe vendosëm që ta bëjmë operacionin”, ka thënë Arteta.

Tekniku spanjoll nuk dha ndonjë datë specifike, por shtoi se ai nuk e priste që White të mbetej jashtë për rreth gjysmë viti.

‘Topçinjtë’ janë pa fitore në elitën e futbollit anglez që nga 5 tetori kur mposhtën Southamptonin dhe momentalisht janë nëntë pikë mbrapa liderit Liverpoolit.

Sidoqoftë, Arteta pati edhe disa lajme pozitive sa i përket të lënduarve pasi konfirmoi se Declan Rice, Bukayo Saka dhe Leandro Trossard që të gjithë janë të gatshëm për duelin me Forest./Telegrafi/