Marsh sensibilizues për personat me nevoja të veçanta në Pejë

Në kuadër të projektit të “Save dhe Children” të mërkurën në qytetin e Pejës është mbajtur marshimi i personave me nevoja të veçanta.

Kjo kampanjë do të mbahet në tërë Kosovën, por e mërkura ka rezultuar të jetë dita ku ky parakalim do të mbahet në qytetin e Pejës.

Egzon Qorkadiu, përfaqësues i Handikos-it në Pejë, ka thënë se ky organizim po bëhet me qëllim të vetëdijesimit të qytetarëve për personat me nevoja të veçanta.

Ai ka thënë për Telegrafin se po synohet që të mos ketë paragjykime ndaj kësaj kategorie të shoqërisë.

“Në qytetin e Pejës, numërohen 280 fëmijë me nevoja të veçanta, por si numër në total, arrin në 934 gjithsejtë”, ka thënë Qorkadiu, duke shtuar se kushtet e tyre financiare nuk janë të mira.

Ndërkaq, Ismet Çeku i cili ka të djalin me nevoja të veçanta ka thënë se ata si prind përballën me vështirësi të shumta. Ai ka treguar se ka mjaftë shpenzime për terapinë të cilën e përdorë fëmija i tij.

“Gjendja e personave me nevoja të veçanta është përmirësuar kohëve të fundit, pasi që është rritur pagesa për ta. Por, duhet një kujdes më i madh si dhe një kujdes më i madh për ta nga njerëzit”, ka shtuar Çeku. /Telegrafi/