Ekonomi

Mbahet edicioni i dytë i Growth Tank, konferencës më të madhe në rajon për Marketing Digjital

Para 2 vitesh

Growth Tank është ndër konferencat më të mëdha në rajon, që po mbahet sot në Prishtinë, me rastin e Ditës Ndërkombëtare të Social Media.

Edicioni i dytë i Growth Tank ka grumbulluar ekspertë vendorë dhe ndërkombëtarë, të cilët ndajnë përvojat e tyre si folës në panelet me tema të ndryshme brenda konferencës.

Disa nga temat që po trajtohen në këtë edicion janë: Programmatic Advertising, Content Revolution, Social media as a Growth Accelerator, E-commerce Marketing, dhe Boost growth through Social Media.

Drejtori Ekzekutiv i Telegrafit, Gentian Lluka, panelist në këtë konferencë, tha se Programmatic Advertising ka 10 vite që ka nisur si proces, ndërsa sot ka arritur në një pikë të jashtëzakonshme të zhvillimit.

Lluka tregoi se kjo është platformë e cila e automatizon procesin e blerjeve dhe reklamave digjitale në media online.

“Momentalisht procesi është manual. Bota ka shumë domene. Ka shumë media ku është e pamundur që agjensionet dhe brendet e mëdha t’i kontaktojnë manualisht të gjitha ato media, që të marrin oferta dhe të lëshojnë kampanja”, tha ai.

Lluka tutje njoftoi se në Kosovë janë identifikuar diku rreth 50 domene që janë të rëndësishme.

“Është e pamundur të komunikosh me të gjitha. Kështu që programi i advertising e zgjidh këtë problem. Konsiston me dy module – një për mediat dhe publikuesit. Pra, i digjitalizon mediat dhe ju mundëson zhvillimin e implementimin e produkteve inovative. Dhe, në anën tjetër është reklamuesi, i cili ka platformë të jashtëzakonshme dhe ka qasje në kohë reale te këto domene”.

Sipas tij, ky inovacion është dashur të ndodhë shumë më herët në Kosovë, por tha se kanë hasur në një problem.

“Kemi një fatkeqësi që Google nuk e njeh gjuhën shqipe dhe faktikisht vetëm audienca shqiptare ka mbetur mbrapa në tregun e madh të zhvillimit teknologjik. Tregu është i jashtëzakonshëm dhe përdoruesi i internetit në Kosovë është ndër të parat në Evropë. Mundësitë për të reklamuar sot në Kosovë janë të mëdha, sidomos pasi që vijnë këto platforma’, pohoi Lluka.

Ai mes tjerash tha se Telegrafi që nga viti 2016 ka filluar implementimin e këtyre platformave digjitale dhe se çdo platformë botërore ka pasur qasje në të.

Ndërsa, Idaver Sheriﬁ, Drejtor Ekzekutiv në ABC News, duke folur për rëndësinë e digjitalizimit të mediave, tha se këto të fundit si në tregun e Shqipërisë ashtu edhe në atë të Kosovës 99 për qind të ardhurave i fitojnë nga bizneset.

Ndaj, siç tha, sistemet digjitale janë të rëndësishme pasi mundësojnë u mundësojnë mediave menaxhim dhe organizim më të mirë të hapësirave dhe targetim të audiencave.

“Digjitalizimi në mediat shqiptare ka filluar nga halli. Por, digjitalizimi i medias nuk do të thotë vetëm të hapësh një faqe në wordpress-i. Kështu që, digjitalizim do të thotë automatizim i të gjitha veprimeve të aktivitetit mediatik”, u shpreh Sherifi.

“Pjesa e faqes që njerëzit shohin është vetëm pjesa e plasimit të përmbajtjes për audiencën. Por, mund të them se si në Shqipëri ashtu edhe në Kosovë, mediat 99 për qind të ardhurat i kanë nga bizneset, pra nuk kemi sisteme të avancuara nga abonimet, dhe gjëja kryesore është se duhet të gjesh mënyrën se si këtë audiencë mund të përdorësh në mënyrën më të mirë. Pra, sistemet digjitale mundësojnë menaxhimin dhe organizimin më të mirë të hapësirave, në mënyrë që të targetosh audiencën e duhur me atë që reklamon”, tha ai.

Arlind Lepaja, Digital Marketer në TopShop, tregoi se si Programmatic Advertising funksionon në Facebook e platforma të tjera.

“Kemi përdorur rrjetet sociale për reklamim të brendeve dhe produkteve, dhe se tash po kërkojmë mundësi të reja për targetim të audiencave. Sepse nuk është mirë që krejt buxhetin me shpenzu në një vend”.